منتديات عشاق الخواطر برعاية الشاعر عمر القاضي

لاقتراحاتكم تجدونا على الفيس بوك facebook ( وكالة بائع الورد الاخبارية فلسطين )https://www.facebook.com/Palestinefriends?fref=photo

المواضيع الأخيرة

» شبكة بوابة فلسطين الاعلامية دخول مباشر للصفحات والمجموعات والمنتديات Palestine
الثلاثاء يوليو 04, 2017 9:54 pm من طرف الشاعر عمر القاضي

» مسابقة حكي فلسطيني بحث وتقديم الشاعر عمر القاضي
الأحد أبريل 23, 2017 4:48 am من طرف الشاعر عمر القاضي

» لانشاء بريد الكتروني جي ميل gmail.com بطريقة سهلة وسريعة
الأربعاء مارس 15, 2017 9:30 am من طرف الشاعر عمر القاضي

» امين عبد الله صناع الامل ديراستيا سلفيت فلسطين
الأحد مارس 12, 2017 2:22 pm من طرف الشاعر عمر القاضي

» يعقوب شاهين Yacoub Shaheeen الصفحة الرسمية فيس بوك
الأربعاء مارس 01, 2017 11:45 am من طرف الشاعر عمر القاضي

» اربح الاموال من الانترنت دون امتلاك موقع فقط من خلال المشاركة بالاستطلاعات
الأربعاء مارس 01, 2017 4:00 am من طرف الشاعر عمر القاضي

» سيرياتوك , سيرياتالك , سيرياتولك | syria talk | سيريا توك , سيريا تالك , سيريا تولك , برنامج سيرياتوك للمحادثة syriatalk.red
الإثنين فبراير 27, 2017 1:53 pm من طرف سيرياتوك

» اليوم 21 ديسمبر شهر 12 بداية فصل الشتاء والمربعانية التي تستمر لمدة 40 يوم
الأربعاء ديسمبر 21, 2016 1:22 am من طرف الشاعر عمر القاضي

» ارشيف المواضيع العامة منتديات كل فلسطين
الأربعاء ديسمبر 21, 2016 1:22 am من طرف الشاعر عمر القاضي

تصويت

زوارنا الاعزاء حددوا جنسياتكم
5% 5% [ 74 ]
5% 5% [ 73 ]
5% 5% [ 72 ]
5% 5% [ 74 ]
5% 5% [ 73 ]
5% 5% [ 70 ]
5% 5% [ 70 ]
5% 5% [ 72 ]
5% 5% [ 70 ]
5% 5% [ 72 ]
5% 5% [ 71 ]
5% 5% [ 72 ]
5% 5% [ 74 ]
5% 5% [ 70 ]
6% 6% [ 76 ]
5% 5% [ 71 ]
5% 5% [ 70 ]
5% 5% [ 70 ]
5% 5% [ 69 ]

مجموع عدد الأصوات : 1363

أفضل 10 أعضاء في هذا الأسبوع

أفضل 10 أعضاء في هذا الشهر

تدفق ال RSS


Yahoo! 
MSN 
AOL 
Netvibes 
Bloglines 

المتواجدون الآن ؟

ككل هناك 1 عُضو حالياً في هذا المنتدى :: 0 عضو مُسجل, 0 عُضو مُختفي و 1 زائر

لا أحد


[ مُعاينة اللائحة بأكملها ]


أكبر عدد للأعضاء المتواجدين في هذا المنتدى في نفس الوقت كان 28 بتاريخ الأحد سبتمبر 02, 2012 10:37 am


ارشيف الامثال الشعبية الفلسطينية

شاطر
avatar
الشاعر عمر القاضي

المساهمات : 695
تاريخ التسجيل : 17/09/2010

ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:24 pm

أمثال فلسطينية على حرف الالف ... مع شرح خفيف




إبحش جبل بمسمار ولا تفهّم حمار ..

أبّع أبّع منشي
 نوع من القسم في القرى لابعاد الشرّ . مثال: شخص يدعو الله ان ينتقم من فلان. فيستدرك اخر بالقول: أبع أبع منشي / لحتى الدعاء لا يستجاب. ويضاف احيانا: فال الله ولا فالك.. الخ

ابعد عن الشر وغنيلو

أبعدلك أسعدلك ..
 مثلا في موضوع النسب يقال إبعد عن القرايب . مثال آخر : شخص يرحل او ينقل مكان سكناه بعيدا عن العائلة او القرايب من باب : أبعدلك أسعدلك. عشان الحياة مع العائلة والقرايب كلها احتكاك وتنافس وغيرة وحسد ومخاصمات عائلية على أتفه الاسباب.. الخ

ابن العم بنزّل بنت عمو عن الفرس .
. وفي رواية : إللي بتحراها ابن عمها بتحرم على الغريب
مثل شعبي معروف سياقه تفضيل نسب القرايب واولاد العم من باب انهم بعرفو بعض ويألفو بعض ومن باب انه الميراث يبقى داخل العائلة ومن باب انه العمّ بمون على اولاد اخوته مثل اولاده ومن باب تقليل الاحتكاك والمخاصمات بين الحماة والكنة لانهن في هاي الحالة بكونو عايشات مع بعض.. الخ

ابن الحرام تزقوش بقع لحالو
ابن الحرام دايما بقع لحالو .. المثل يحث انك ما توسخ ايديك في مواجهة مباشرة مع اولاد الحرام لانه راح تيجي الفرصة انهم يقعو لحالهم بسبب انه كل حياتهم غلط بغلط وكل ممشاهم يجلب عليهم الخطر والعداوة والانتقام ولهيك راح يوقعو لحالهم لا محالة ..

ابن الحلال عند ذكره ببان
ابن الحلال لما تجيب سيرته ببيّن... وابن الحلال لما تجيب سيرته بيجي
هيك معتقد شعبي.. يقال لما تمدح شخص او تذكره بالخير او مجرد انك جايب سيرته وفجأة بيجي.

ابن بطني بفهم رطني
ويقال: ما بفهم رطني الا ابن بطني .. يعني الولد مثلا دايما بفهم شو أمو بترطن ، شو ما هردشت يعني خربطت بالحكي بفهم عليها .. كمان الام طبعا بتفهم على ابنها شو برطُن يعني شو بحكي حتى لو انو حكيو بفهّمش او مش واضح..
ويقال عن أصدقاء مقربين او قرايب او معلم وطالب او طبيب ومريض او كل شخص يفهم رطن شخص اخر مقرب منه.

ابو زيد خالك ..
مثال: مجرد انك تتحمل تعيش في وضع صعب بكون ابو زيد خالك..
 او مثلا: اذا بتقدر تحصّل من فلان اشي، ابو زيد خالك!
او اذا بتقدر تحصل على الوظيفة الفلانية او تحقق الهدف الفلاني , ابو زيد خالك..
والمقصود ابو زيد الهلالي البطل الاسطوري المعروف. هناك قصة مع ابن اخته متوفرة على الشبكة. منها جائت مقولة ابو زيد خالك على اساس انه ابو زيد بكون خال ابن اخته !!

ابو قزمة وابو فاس تقاتلو ع مال الناس ..
وفي رواية : ابو حديدة وابو فاس تقاتلو ع مال الناس .. يعني اثنين طابشين روسهم وحارقين اعصابهم ومضيعين وقتهم على اشي مش الهم .. او اشي مالهمش فيه .. او على النميمة والمغيبة ومشاكل غيرهم.
والقزمة والفاس من عدة الفلاح ومنها جائت الألقاب.

ابو عين حمرا ..
يقال عن شخص عينيه بقادحن من الغضب وبصير لونهم احمر . مثلا اب او أخ كبير يهابه أخوته. فيقال من باب ترهيب الاولاد: هسا بيجي ابو عين حمرا ..!

أبو واحد بطعم عشرين ولد. لكن عشرين ولد بطعموش أب واحد ..
هيك حال الحياة. أب واحد يعيل عشرة او عشرين ولد , لكن لما بهرم وبشيخ وبحتاج اولاده بكون الوضع غير لانه اولاده بكونو في الغالب صارو مشغولين باولادهم. وعموما الولاد مش بالزبط قلبهم على ابوهم وامهم. كما يقال: قلبي على ابني وقلب ابني على حجر ..
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:29 pm

لغة فلسطينية.. خراريف وتراث ايام زمان... جمعها لكم محرر الصفحة احمد ابو هلال عاره




قالوا عن نيسان
في نيسان اطفي نارك.. وافتح شبابيك دارك - في نيسان.. الحصيدة وين ما كان وفي نيسان أول النهار وَحِلْ.. وتاليه مَحِلْ - في نيسان بتصير الدنيا عروس.. وبخفف الناس الغطا واللبوس - في نيسان بتفقص الصيصان وبيدفا كل إنسان - كانون فحلها.. ونيسان محلها - كل نقطة في نيسان.. تسوى كل سيل سال - مطر نيسان خير وصحة للإنسان - المطرة في نيسان جواهر ما إلها أثمان و بتحيي الأرض والإنسان - مطرة نيسان تسوى السكة والفدان والراقد عالصيصان - نيسان بطعمي الجوعان وبدفّي العريان..
شتوة نيسان بتسوى العدة والفدان
طبعا الأمثال الشعبية في قريتنا عاره عرعره لا تختلف عن الأمثال الشعبية في أرجاء فلسطين. والمثل المشار اليه يعبر عن أهمية هطول الامطار في شهر نيسان بعد انحباس المطر في العادة خلال هذا الشهر. فالزرع في نيسان يكون في أمس الحاجة الى المطر . وكان أهلنا زمان يقولون: في نيسان ظب العدة والفدان بمعنى ان المطر انتهى وكانوا يظبوا عدة الزراعة وينتظروا المحصول. وعندما تمطر السماء في نيسان يكون للمطر أهمية خاصة فيقال: شتوة نيسان بتسوى العدة والفدان. وايضا: شتوة نيسان بتحيي العدة والفدان اي انها تحيي الارض وتحيي موسم الزراعة من جديد. وقد أمطرت السماء فعلا خلال الايام الاخيرة لكن اليوم غالبية أهل بلدنا لا يعملون في الزراعة وما تبقى هو تذكير الجيل الجديد بأمثال أهلنا ايام زمان.
وكلمة نيسان قديمة جدا ومتداولة في كافة أنحاء المشرق القديم وهي من مقطعين: ني ومعناها جديد وهي أصل كلمة نيو باللغات اللاتينية. و سان ومعناها سنة. فيكون المعنى: السنة الجديدة كون نيسان اول شهور السنة في التقويم القديم عند شعوب المشرق وكان يشهد احتفالات كبيرة على مدار عدة ايام. وليس غريبا ان تكون انطلاقة السنة الجديدة مع بداية الربيع الذي يجلب معه الخير والبركة والعطاء.


ينعن صفحة ابوه
مقطوع من شجرة
درب تودّي وما تجيب
رابطك المشمش الحموي ؟؟ (بحكو عن واحد لزقة..
سري مري .. واحد طالع نازل على محل معين


الزّهر بقهر قهر :
 شفت سيارة لونها زهري وتذكرت المثل اللي بحكي انو اللون الزهري بقهر قهر


وتمختري يا حلوة يا زينة ........
. أغنية تجلاة العروس المعروفة تستخدم احيانا لما تشوفلك شخص او سيارة بتمختر على مهله كأنه الشارع لأبوه

لعنة الله تنزل عليك كل ما الكلب يهزّ ذنبته ........
مسبية فلسطينية 10%. صعبة شوية

حياني ع اللي بروح / حياني ع اللي بروح وما برجع ... 
 تقال لما واحد بقول مثلا راحت المصاري او راحت السيارة ..الخ. يقال له: حياني (خسارة) ع اللي بموت ..وهكذا. ويقال في نفس السياق: بالمال ولا بالعيال

خيبة بتجر خيبة .. 
هيك الحياة.. نجاح بجرّ نجاح والفشل بجيب فشل

أنجس من ذنبة الكلب / الحية / الفار 
. وصف صعب لانسان لئيم ونواياه خبيثة

اللي بدو كل شي نهايته يخسر كل شي

مش منّو وجاي :
الشركات الخلوية كلها شركات نصب. شركة بلفون وشركة سلكوم.. وطبعا باقي الشركات مش منهم وجاي. يعني مش أقل منهم. مش منهم وجاي الا منهم وغاد يعني أبعد منهم بالنصب... يعني كلهم أزفت من بعضهم البعض.

الناس معادن ...
ويقال ايضا الناس أجناس .. ويقال الناس معشر ... ما بتعرف الانسان من غير ما تعاشره


من أغاني وأهازيج أهالي عاره وعرعره
خطاف عيني خطاف سبوعة يا رجال الخطاف..
وين اخوة عمشة 
كانت هذه من الأغاني الحماسية في بلدنا وقد نسيها الناس اليوم بعد ما تغيّرت الحياة. كان أهل بلدنا اذا ضاق بهم الحال واحتاجوا لفزعة من ينادي المنادي: وين اخوات عمشة او وين اخوة عمشة. وعمشة من جدات دار يونس كبرى عائلات البلد وكانوا يقصدون اهل البلد كلهم. كانت تفزع اهالي عرعره عن بكرة أبيها عند الملمات والنوازل لا يتأخر منهم أحد. قال لي عمي ذات مرة. قالها بمرارة وهو يتنهّد : آآآآآه لما عرعره بقت عرعره. كلنا بقينا على قلب رجل واحد. لما يتعرض حدا منا لاعتداء كانت كل اهل البلد تفزع لمساعدته ونجدته. لكن اليوم وين احنا... الزمن تغير كثير . وبطلت قلوبنا على بعضها. بقينا نفزع واحنا نصيح : خطاف عيني خطاف سبوعة يا رجال الخطاف. والخطاف هو سلسلة الجبال التي تحتضن قرية عرعره. ورجال الخطاف هم طبعا اهل عرعره.

نامت نومها كله وقامت لأبنها تغلّه
تقال عن المرأة اللي بعد نوم طويل قامت عصبية تعمل مشاكل وتتفشش باللي بيجي قدامها..

زي غولية شباط
الغولية الها مكانة بارزة في الفولكلور الفلسطيني. ذلك الكائن الليلي الذي لا يُرى تظهر على حين غرة دون ان تشعر بها. قصص كثيرة عن الغولية اللي تخطف الاطفال وتسكن في أماكن مهجورة. والأهل طبعا يستخدمون قصص الغولية لحتى يخوفوا الاطفال ما يطلعوا من الدار في الليل وما يروحوا بعيد في ساعات النهار لحتى ما يتعرضوا للخطر . وغولية شباط زي ما كنت اسمع عنها من الوالدة هي غولية نشيطة وقوية بتتحرك وبتتشاقط بشكل نشط . تتشاقط = تتحرك بشكل مشاكس وبهلواني.

اللي بنكوي من الحليب بنفّخ على اللبن..
 وباللفظ القروي: الي بنتشوي من الحليب بنّفخ على اللبن... ويقال ايضا: اللي بنكوي من السخن بوخذ حذره بالفاتر .. ويقال في نفس السياق: المقروص بخاف من جرّة الحبل. طبعا لانه بصير يفكر الحبل حيّة..

من وحي اللغة الفلسطينية :
باكر طيب = صباح الخير
باكر = بوكر باللفظ العبري القريب من العربي ومعناها صباح
طيب = تلفظ  tov   بالعبري من نفس المصدر طيب ونفس المعنى
من وحي اللغات القديمة : باكر طيب لكم جميعا

الساعة الان بعد الظهر ........
الآذان في بلدنا هو أكثر من طقس ديني فهو ايضا توقيت. تعودنا نقول الصبح والظهر والعصر وبعد العصر وقبل المغرب وهكذا ..
بس ما منقول الساعة انما يقال: الدنيا الان بعد العصر . الدنيا هون بمعنى الوقت او الساعة. مثلما يقال: الدنيا مطر يعني الطقس ماطر .

من المصطلحات الدارجة في بلدنا:
عاش مين شافك.. وعاش مين سمع صوتك.. تقال لواحد يعني شخص زمان ما شفناه او سمعنا صوته.

ما عاش اللي ........
 والها اكثر من كمالة (تكملة) مثلا يقال من باب النخوة لانسان في ضيق: ما عاش اللي يتعدى عليك واحنا موجودين.... وهكذا

الجسم هون والروح بمحل ثاني
احيانا كثيرة بكون الشخص قاعد معاك بس عقله ووجدانه في محل ثاني. مثلا واحد بعيد عن اهله بكون جالس معك بس عقله مع أهله... وهكذا

يا ما احلاها هذيك الايام ...
 تقال بنغمة يملأها الحنين الى ايام زمان. ساق الله هذيك الايام. او ساق الله ايام زمان. وين راحت هذيك الايام. (وتلفظ اختصارا سقى الله).. ساق الله الزمان يعود وليت الزمان يعود... الخ

دِب دي ...
 نزلوا عليها دب دي.. يعني طواشا.. بدون تخطيط... بدون سابق معرفة.. واحد نزل على موضوع يعني دخل على مجال بدون سابق خبرة وتجربة. يقال: هيك نزل عليها نزول..

جحيش لمين ركب
يعني جحش فالت كل واحد بركبه. جحيش طبعا تخفيف وتدليع لكلمة جحش. وهيك يقال عن بنآدم اللي الكل راكبه بمعنى الكل مستلبسه ومستوطي حيطه ومستغله.

شاب طويل عريض بهد الحيط
تقال بالعادة بالمعنى السلبي. مثلا يقال عن شاب داير بشحد: شاب طويل عريض بهدّ الحيط ليش ما يروح يشتغل... وهكذا

بِنغَد مية ... من المصطلحات الفلسطينية الطريفة.. المقصود بشرب مية بشيء من الشهية... للارتواء وما شابه
  
القصار بجيبها !
تعبير جديد نسبيا انتشر في القرى الفلسطينية التي يعمل الكثير من أبناءها في مجال القصارة والبناء. من الدارج ان البناء يكون احيانا اعوج فيكون التعويل على القصار انو يصحح الاعوجاج. من هون اجت مقولة: القصار بجيبها. يعني بزبطها وبصححها. وصارت المقولة تستخدم في مجالات عدة لما بكون اعوجاج من قبل شخص او جماعة يقال بشيء من الهزار: القصار بجيبها! العبارة حلوة المذاق على الالسن لانها جاءت من مجال البناء والقصارة فالامثال كانت تأتي في الماضي من الزراعة والمناسبات الاجتماعية حيث لم يكن فرع البناء منتشر مثل اليوم .
امير عارا - احمد ابو هلال
  
اسرائيل دولة اوراق
عبارة حفظناها عن الختيارية كانوا يرددونها كثيرا عن المؤسسة الاسرائيلية يقولون عن تجربة انه في اسرائيل لا يتجاوب معك احد بدون اوراق ثبوتية او الاوراق اللازمة لحل اي قضية. دائما يطلبون منك ان تحضر اثبات خطي او شهادة خطية ولا يعالج الموظف اي امر بدون اوراق. وتأتي المقولة احيانا لتوحي بان الكثير من الظلم يقع بسبب هذه الاوراق لانه احيانا كثيرة الظالم يكسب القضية لانه احضر اوراق لا اكثر. الكثير من الاجحاف والغبن وقع بسبب هذه الاوراق. بمعنى ان المقولة تستخدم في اكثر من سياق. تارة للتذكير بان الحفاظ على الاوراق مهم وتارة اخرى استنكارا للوضع القائم واحيانا للدفاع عن موقف فتجد الموظف يقول لك ماذا عساني فاعل؟ هاي دولة اوراق.. عليك ان تحضر الاوراق..
  
زغرتي يا انشراح اللي جاي أزفت من اللي راح
المقولة القصد منها انه لا شيء يفيد في الوضع القائم سواء زغردتنا او حزننا فان القادم أسوأ. المقولة تنم عن يأس واحباط واحيانا السخرية فترى الناس يحتفلون ويزغرتون فيما لا يدرون ان القادم أسوأ. واحيانا من باب اليأس يقال زغرتي يا انشراح احسن من الحزن والبكاء ماهي خربانة خربانة خلينا ع القليلة نفرح. هناك من يُدرج هذه المقولة ضمن المقولات التي تحض على اليأس. اما اختيار اسم انشراح فهو اسم دارج اولا وللوزن ثانيا لتتوافق مع كلمة اللي راح في اخر المقولة.
  
من عقليات القرى :
وحده بدها تروح على محل مرطت شعر بنتها مرعتلها شعرها مزّتها عشان تعيط
ليست هذه مقولة بل وصف لما يحصل في الكثير من الاحيان لما المرأة بدها تروح على محل لكن جوزها مش متحمس بتروح مارعة شعر البنت او بتروح قارصة الولد عشان يبكي وهيك بترمي الموضوع عليه وكأنه الولد ببكي عشان يطلع مشوار فيما الحقيقة انه الام هي اللي طالبة المشوار ...
  
معاك على البحر
يعني انا معاك وين ما بدك. على السراء والضراء. ظالم او مظلوم . واثق فيك تماما. ماشي معاك وجنبك وفي صفّك والى جانبك. متحيّز لطرفك في قضية معينة. داعمك ومساندك في مسألة معينة. واقف لجانبك مهما كانت الظروف حتى لو بدك تاخذني على البحر ..
  
اللي كان في قلب الحدث مش زي اللي بحكي بالوساع
ما بفهم الطابق يعني الموضوع الا اللي كان فيه من أوله لآخره مش اللي عاشه من بعيد. عشان تفهم موضوع لازم تكون جزء منه. اللي بحكي بمرارة وألم لانه عايش الموضوع مش زي اللي بحكي بالوساع يعني من بعيد وبدون ضغط. بالوساع عكس بالذياق. ذيق في لغة القرية هي كلمة مخففة ل ضيق. بالذياق يعني في وضع ضيق وضغط ومعاناة ووجع. عكسها بالوساع يعني واحد ما دخله بالامر ومش شاعر بالوجع بحكي اللي بدو اياه.
  
انت اهبل والا بتتهبل علينا..!؟
لما واحد بحكي كلام مالوش معنى او مالوش محل من الاعراب ف اما انو أهبل او انه مستهبل العالم يعني بتغابى لغرض في نفسه. فيقال له انت اهبل والا بتتهبل ع الناس...؟!

وفي أمثال شارحة حالها مثل :

زي اللي بحرث ببحر .. احنا قاعدين منحرث في بحر

جاي يبيع مية بحارة السقايين.. او رايح يبيع مية في حارة السقايين

كلو بلعب على كلو 
الشيء ما بيجي بالهيّن ... ويقال: بشقى لحتى يلقى 
لو دامت لغيرك ما وصلت الك ... الزمن دوار
   
طغاك اللي بلغك.. او اللي بلّغك ضلّلك
احيانا واحد بحكي اشياء غلط مش لانه قصده الكذب انما لانه هيك قالوله. لهيك يقال: طغاك – يعني ضلّلك – اللي بلّغك – يعني اللي خبّرك وحكالك الاشي الغلط.

عليها وباتت
كلمة موافقة فيها اصرار على الفعل او تشديد وتأكيد على الموافقة. تعرض على واحد شيء فيقول لك: عليها وباتت. يعني يلا موافق. عبارة فيها إقدام. تفيد ايضا: الى الامام! وتعني عقد العزم والنية لخوض امر ما.

وهاي امثال اثنين من صديقي التاجر أسيد زيود :

سكر باب دارك ولا تخوّن جارك – المقصود لا بدل لا توصل لوضع محرج انك تخوّن جارك أفضل تسكر باب دارك وهيك تمنع كلاهما الخيانة والحرج.

من سرى باع واشترى – المثل شارح حاله يحث على الاجتهاد والنشاط والسعي.

بندقت اللعبة
عبارة كنا نستخدمها كثير واحنا زغار لما كنا نلعب احيانا كانت اللعبة تلتغي لانه واحد ما التزم باحد شروط اللعبة فيقال : بندقت. يعني التغى هذا الشوط ونبدأ من جديد.

صليلك على كوم انبيا
في القرية في كثير عبارات مفاجأة. ف بدل ان يقال : صلي على النبي بتلاقي واحد بقولك: صلي على كوم أنبياء!

بجيش على حواكير !
العبارة انتشرت بعد ما حكاها مغني أعراس من الشمال. اتصل واحد من بلدنا. قروي فلاح بلدياتنا. اتصل بمطرب من الشمال يعني من الجليل عشان يحجز لحفلة عرس. سأله المغني وين راح تكون الحفلة. جاوبه: عادي في قاع الدار او على البيدر او في الشارع .. حكاله المغني: عفوا انا بَجيش على حواكير !

يا نوَر يا زُط :
الحكي عن الغجر : يطلق عليهم في فارس زط وفي سوريا وفلسطين نَوَر . النور اشتهروا بالهمجنة والتسيب واشتقنت منهم كلمة نَورنة! ولما بدك تقول لشخص او مجموعة انهم فوضوية وهمج يقال: يا نَور يا زط ! والمسرفين بضيفوا : يا حَوَش !
  
زي المرا اللي طالعة من الطابون
بحكوا عن مرا (امرأة) طالعة من الطابون ايام الطوابين ايام زمان. بكون شكلها غير شكل. طبعا الطابون حامي كثير بالصيف وملان دخنة وشحار وكله هذا يترك أثر على الداخل والخارج من الطابون.

لما جارك بخير انت بخير
أفضل يكون جارك حالته مليحة وسعيد في حياته! لانه كل ما كان باله هادي بكون أقل شرّ تجاه جيرانه. وكل ما كان وضعه المادي احسن بكون أقل شراسة تجاه الجيران. وكل ما كان أرقى بكون أحسن وأهدا بالنسبة للجيران. عشان هيك قيل اسأل عن الجار قبل الدار .
  
وقِعت وما حدا سمى عليك
يقال لانسان شرير او انسان متعجرف او سلبي او معاملته مش مليحة مع الناس. بكونوا الناس مستنيينلو وقعة ولما بقع يقال وْقِعت وما حدا سمّى عليك يعني ما حد شفق عليك او رحمك او تأثر لسقوطك.

خبَصها / خبصَتها
واحد بجيب سيارة جديدة او بفتح مشروع مرة وحدة او بغامر في امر معين يقال : خَبَصها! يعني عملها! قوّى قلبه وقامر . والخبيصة في بلدنا هي الحمرا والبيضا نوع طبخة حليب ورُب. والخبصة هي انك تخبص شغلتين مع بعض او تلخّ اشي يعني تخلطه. والمقصود هون طبعا نوع من التخليط والمغامرة.

المصاري (الفلوس)
كلمة مصاري الدارجة في القرى أجت من كلمة مصر من ايام الحكم المصري على البلاد. طبعا كل حكم بترك أثر يعني مثلا يصك عملة جديدة وما الى ذلك. يقال ايضا فلوس لكن الدارج اكثر في وادي عاره كلمة مصاري. وهي زي ما حكينا ذكرى من الحكم المصري على بلادنا.

وكأنك يا ابو زيد ما غزيت
ابو زيد الهلالي مشهور في التاريخ في صولاته وجولاته. اشتهر اسمه في تغريبة بني هلال. المثل يقال لما واحد ببذل مجهود ع الفاضي او بعمل اشي وبرجع بخفي حنين يقال عنه يا ريته ما تعب ولا شقي لانه كل جهده راح ع الفاضي. وكأنه طلع على الغزو ورجع بدون نتيجة.

لما بتحتاجهم بتلقاهم.. يعني تجدهم بجانبك اذا جدّ الجد
يقال عن ناس عندهم أصالة مثل صديق مليح او انسان نخوة او شخص عنده همّة وشهامة. طبعا المقصود ناس مقربين تثق فيهم وقت النوازل وتجدهم بجانبك في الشدائد .

تقتّلوا قرايبه وهو يتشكّل/ يتشمّر
يتشمّر يعني يشمّر ردانيه. ويتشكّل نفس المعنى يعني بشكّل ردانيه تحسبا وتأهبا لشيء معين. لما يحدث أمر جلل يحتاج الى وقفة وفعل تجد الناس يتشمروا. والمثل هون بحكي عن شخص متخاذل انتهت الوقعة وهو يتشمر .

ولا تزعل... كل شي ولا زعلك
عبارة تستخدم في اكثر من سياق. مثلا واحد بحكيلك شيء وانت تنشغل بالتدقيق بالامور الجانبية على حساب الجوهر. بحكيلك: طيب يا اخوي ولا تزعل الامر هيك هيك .... او لمراضاة شخص يعني واحد يسترضيك ويلبي طلبك قائلا لك كل شي ولا زعلك. احنا منقدرش على زعلك. وهكذا.
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:34 pm

والله لا يعبّدونا العجل..
مثال جماعة او طرف معين اللي انت خايف انهم يحكموا خوف ما ينتقموا من الشعب او من المعارضين او يصفوا حسابات وهكذا. يقال: والله اذا أخذوها (نجحوا في الانتخابات) الا يعبّدونا العجل. وقصة العجل اللي عبدوه بني اسرائيل مشهورة. يعبّدونا العجل يعني يجبرونا على اشي اجبار وذل ومشقة.
  
بفكّش الخط .
. بفكش المكتوب.. يعني أمي لا يقرأ ولا يكتب لدرجة انه ما بعرف يحلل خط او يقرا مكتوب.

اللعب ع المكشوف
أوقات الناس بجاملوا بعض وبداروا وبخبوا وجههم الحقيقي لغايات مجاملة ونفاق وأقنعة وكذب وخداع وغيره. لحد ما بيجي وقت وكل هاي الكروت بتنحرق وبتنتهي صلاحيتها وبصير اللعب على المكشوف..

بتلاقيش ولا مصرّخ / بتلقاش ولا مصرّخ
مثال: ساعة الافطار في رمضان بتلاقيش بالبلد ولا مصرّخ يعني ما بتلاقي صوت في الشوارع لانه كل الناس قاعدة على الافطار .

للي قالته ليلى بتقول لواحد عندي سرّ بس بديش احكيلك اياه. بقولك: للي قالته ليلى! يعني بلاش! او شخص بقولك شو رايك ترافقني مشوار. بتقولو بغدرش. بقولك للي قالته ليلى! وهكذا. لكن هي شو قالت ليلى؟ قالت: بلاش!

مش عاجبك ارحل من هالبلد
ساعات بكون مش عاجبك شغلة او شغلات في بلدك او في عيلتك الخ. بتشكي وبتحكي كل الوقت لكن الغالبية بكون رايها مخالف الك. لحد ما بقولولك: مش عاجبك هالعيشة شوف غيرها! مش عاجبك ارحل من هالبلد!

أطلع العاقة !
يعني عوّض اللي فات. العاقة يعني النقص او القصور . مثلا واحد خسر في شغلة وبعدها ربح واطلع العاقة او يقال ايضا طلّع العاقة وهكذا.

ألعن من الراح واللي اجا /
 وفي رواية اخرى أقطع من اللي راح واللي اجا / أدهى/ أوسخ من اللي راح...الخ
مثال: بيجيك واحد بتفوق على كل اللي قبله في بياخته وسقاعته وثقلة دمه ومرات دهاءه ولئامته. بقولو : هذا طلع اعطل من اللي راح واجا.. وهكذا. ويقال في نفس السياق: اجا تا يطلّ سبق الكلّ.

خدوم
دايما بتلاقي واحد في العيلة او في الشلة بقولولو خدوم يعني بخدم الجميع بدون مقابل ولا حمد ولا جميلة. منهم بعمل هيك عشان ينقبل داخل الشلة او هو طبعه هيك او اي سبب ثاني. هذا هو الخدوم .

قدها وقدود
المقصود الشخص اللي بكون قد الحِمل او على قد المسؤولية. مثلا الجماعة بحاجة لشخص لمهمة معينة او واحد بعزم جماعته على عشاء مثلا وهكذا. اذا بكون على قد المهمة بقولو عنه: قدها وقدود. قدها يعني قد المسؤولية يعني على قدر المسؤولية. قدود للتأكيد .

الحاضر يعلم الغايب
لما بدك تعمم خبر بتحكي للموجودين وبتقولهم : الحاضر يعلم الغايب يعني يبلّغ الغايب.

حايشها من كلو
واحد مثلا شكله وحش ودمه ثقيل وجاهل وعنيد وفي كل الصفات الوحشة. بقولو عنه: هذا يم حايشها من كله. يعني حايش بمعنى جامع كل الصفات البشعة. ويقال المثل طبعا بالمعنى الايجابي ايضا.

الجن الازرق
الجن الازرق هذا ما حد بعرف وين عايش وكيف عايش. مخلوق مجهول ساكن في مكان مجهول. المقصود مخلوق غير موجود. مثلا واحد بدو يخبي شغلة بروح مخبيها في محل اللي حتى الجن الازرق ما بندلّها يعني ما بعرف وين هي.

تجيب قراره
يعني تسبر اغواره. تجيب خبره. يعني تحلّ اللغز وتكشف المخفي. مثلا شخص ما حد بعرف عنه اشي. بقوم واحد بقول: انا بجيبلكم قراره او بجيب خبره يعني بجيبلكم اخباره وبعرفلكم قصته.

كل شي بتقوله محسوب عليك
لسانك حصانك ان خنته خانك وان صنته صانك. دايما دير بالك ع لسانك لانه كل شي بتحكيه مسجل في ذاكرة الناس ومحسوب عليك ويوم من الايام بتتحاسب عليه او ممكن يكون ضدك.

اذا صار ما صار
يعني في حال صار شيء غير متوقع.

انت كريم واحنا منستاهل
عبارة دارجة في سياق معين. مثلا واحد بعرض عليك عطاء او هدية. يقال للتخفيف والتلطيف: انت كريم واحنا منستاهل!

همّ ببكّي وهمّ بضحّك.. احيانا بتكون أجواء صعبة حزينة وكئيبة وفجأة بطلعلك واحد مع نكتة او نهفة لا هي ع البال ولا ع الخاطر ... يضحك الجميع قائلين: همّ ببكي وهمّ بضحك ......
  
صاحي عكا وهي خصاص
المقصود شخص كبير في السن صاحي حكا ايام زمان لما كانت بيوتها من خصاص جمع خُص يعني بيت من طين وقش. واحيانا بكون المقصود شخص يحرج من السؤال عن عمره فيقلل من عمره فيقال عنه : صاحي عكا وهي خصاص للاشاره الى كبر سنه.

انو وراك بعصاه
يعني ليش مستعجل وكأنه واحد حامل لك عصاه او لاحقك بعصاه..؟

فخارة فاضية
يضرب في شخص فاضي بمعنى جاهل لا يفقه شيء.

جمل المحامل
يضرب في شخص يحمل همومك مثل الجمل اللي يشيل الحمول .
  
باب النجار مخلَّع
مثل الاسكافي حافي والخياط عريان
  
صفر على الشمال
للاشارة الى شيء او شخص عديم القيمة
  
عن جنب وطرف
بلش يضرب فيه عن جنب وطرف.. وين الجنب اللي بوجعك .
بلشنا نصرف ونبعزق بالمصاري عن جنب وطرف.. على يمين وشمال..
بلش حكي ومسبيات عن جنب وطرف.. يا ثِم قول ويا عين لا تستحي..
هذه أمثلة على استخدام المثل. يعني عن يمين وعن شمال عن باب وجي بدون تمييز .
  
اللي الو الو واللي للناس الو
في اشارة الى شخص طماع يريد كل شيء. يريد اللي الو واللي لغيرو .
  
خربها وقعد على تلها
كناية عن فلان . يضرب فيمن يفسد أمراً لا سبيل لإصلاحه . ويقصدون به : إنه خرّب الأرض، ثم جلس على مرتفع منها ليرى إن كان نسى شيئاً لم يخربه، وهو من أمثال إفساد ذات البين .

 أنطق يا حجر !
لما واحد بدهم اياه يحكي وهو مش راضي يحكي 
وتقال ايضا أنطق يا حيط !
لما بتحكي مع واحد دبشة! لا بدو يفهم ولا يستفهم.. يُقال في هذه الحالة: لو تحكي مع الحيط أهون! لانه هيك بكون امامك حل واحد فقط انك تحكي مع الحيط! تقوله: أنطق يا حيط ! او : رُدّ يا حيط !
ولما بتحكي مع واحد اخرس! المقصود واحد بحكيش! انت بتحكي بتحكي وهو ساكت. ممكن انه ابكم! او لانه فش اشي يحكيه.. او بدوش يحكي من أساسه.. او بدك منه اشي وهو بدوش يحكي.. بتحكي من اليأس: أنطق يا حجر !
  
 قصة وعبرة... الغبي هو اللي بفكر الناس أغبياء..
 مشاركة من بلال ملحم (ابو العيله)
نحكيها بالفلسطيني :
ولد زغير بروح كل يوم عند الحلاق وبطلب منه ثلاثة شيقل عشان يشتري بوظة والحلاق بعطيه. الولد تعوّد يروح كل يوم عند الحلاق ويوخذ 3 شيقل. يوم فات الولد عند الحلاق وكان عند الحلاق زبون قاعد بحلق. الحلاق اجا على باله شغلة. قال للزبون شوف شو بدي اعمل مع هذا الولد. طال الحلاق من جيبته 100 دولار وحطها في ايدو اليمين وطلّع من جيبته الثانية 3 شيقل وحطها في ايدو الشمال. وعرض على الولد يختار وحده منهن. الولد اختار ال 3 شيقل وراح اشترى فيهن بوظة. التفت الحلاق وحكى للزبون انه كل يوم الولد بعمل نفس الشغلة دايما بختار ال 3 شيقل. شفت انه الولد غبي؟؟ قال الحلاق. قالو الزبون تعال نسأله للولد ليش بعمل هيك. نادوا على الولد وكان يوكل بوظة وسألوه. قالهم الولد اسمعوا. اذا باخد ال 100 دولار بتموت اللعبة!! يعني الحلاق مش راح يعطيني فلوس زيادة. بينما اذا أخذت ال3 شيقل بغدر (ممكن) ارجع كل يوم. الحلاق والزبون تطلّعوا على بعض وقالوا: فعلا الغبي هو اللي بفكر الناس أغبياء ..
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:39 pm

أحنّ الى أمثال أمي ... أمثال وادي عارا
مثل اليوم : اللي بزعل يزعل وفي رواية اخرى يطق راسه بالحيط
سياق المثل
ذهبت اليوم كعادتي الى البقالة. كل أصحاب الدكاكين أصحابي ومعارفي واولاد بلدي لذلك أوزّع مشترياتي المتواضعة عليهم جميعا فأشتري تارة من عند هذا وتارة من عند ذاك. لكن اليوم الجمعة استثنائي لأن بعضهم يوزعون جرايد الجمعة على الزبائن. بالتالي اقتنيت بضعة حاجيات من ثلاث دكاكين! وعندما كنت أدخل عند أحدهم كان يشاهد الحاجيات من الدكان الاخر ويستغل الفرصة ليسألني عن أسعارها. هكذا أرضيهم جميعا وأرضي نفسي. وعندما كنت في طريقي الى البيت تذكرت مثلا طالما سمعته من والدتي كانت تقول: اللي بزعل يزعل واللي برضا يرضا. لا جاييني من زعل هاذ ولا من رضا هاذ.
ومن مأثورات القول ان ارضاء الناس غاية لا تُدرك.
وأهل بلدنا يرددون المثل بأكثر من شكل فيقولون :

اللي بزعل آخرتو بِرضا .. واللي بزعل يطق راسو بالحيط .. اللي بزعل واللي برضى كله واحد .. والزعلان اكثر من الراضي ..الخ


ليست هناك تعليقات:
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:45 pm

لغة فلسطينية.. وجبة دسمة من المصطلحات الفلسطينية المتداولة , مع شرح خفيف لكل مصطلح..





// احمد ابو هلال

جمعتها لكم من هنا وهناك من اللغة الفلسطينية الدارجة. ذكرى للاجيال. فاللغة تتغير وتتطور مع الزمن وأود ان تبقى ذكرى وعبرة من لغة الأجداد التي ما زالت حية وما زلنا نتداولها وان كنا نسينا بعضها. اليكم هذه الوجبة الدسمة من مقولات فلسطينية شائعة منها ما هو تراثي ومنها ما هو دارج على ألسنة الناس حتى اليوم. هذه الوجبة ليست الاولى ولن تكون الاخيرة. أرشيفي زاخر . منه ما تم نشره على مدوناتي التي تظهر روابطها هنا. والباقي ينتظر :



نص نصيص
من القصص المشهورة في الفولكلور الفلسطيني وهي متوفرة على الانترنت. حكتهالنا والدتي وجدتي مرارا وخصوصا أذكر مقطع السخلة وهي هاربة ب نص نصيص واخوته من الغولة كانت السخلة طايرة من السرعة! وأنقذتهم من الغولة.

صبرنا ونلنا
من درر الختياريات. المراد منها صبرنا ونلنا مرادنا..

اللي خِلِق عِلِق
شارحة حالها.  اللي خلق راح يعلق ويغرق بالمشاكل وبده يتحمل.

اللي عليك عليك
يعني لا تؤجل أعمالك باشرها طوّالي لانه اللي عليك عليك سواء اليوم او بكرا .. لا تؤجل عملك الى الغد

جبينة
قصة من الفولكلور الفلسطيني. جبينة اسم فتاة تدور القصة حولها. ما زلت أذكر أغنية جبينة وهي بعيدة عن منزل أهلها أنشدت : يا طيور الطايرة يا وحوش دايرة سلّمن ع امي وابوي وقلن جبينة راعية ، ترعى غنم ترعى توق تقيّل بفيّة الدالية ..

لِولَوي
فتاة من التراث الفلسطيني كانت تحكيها الجدة للاحفاد. أذكر أغنية لولوي والغولة حين وقعت لولوي في الاسر عند الغولة وصارت خادمة :
الغوله : يا لولوي يا لولوي دَلّي شعورك واطلعي وانشلي عمتك بالحبال
لولوي بعد ان برمجت أواني البيت وهربت قال اللّكن : بتغسل بتغسل، وقالت المكنسة: بتكنس بتكنس ... وهكذا.. حتى تسنى للولوي الهرب.

عند الغوله عرس!
وتتمتها : يلا يلا تكفّي قيطها يعني اولادها! لما بكون عرس عند الغوله بتوكل الطعام مع اولادها وما بظل للضيوف.. يستخدم المثل في نفس السياق

شطح بطح
من مصطلحات الختياريات. مثال: جيتك شَطَح بَطَح يعني بسرعة فائقة ... وهكذا

دفاتر عتيقة
يقال فتح علينا مواجع وقلّب علينا مواجع وفتح علينا دفاتر عتيقة يعني فتح جرح غائر او حكاية منسية ... وهكذا

حانا ومانا
قصة حانا ومانا معروفة يمكن قراءنها على الانترنت. مشهورة منها عبارة بين حانا ومانا ضاعت لحانا ..

زي اللي بتعجن عجين مليح ولما تخبزه بطلع فحم
اشارة لشيء جميل ومتقن لكن نهايته كان فيها خلل لسوء الخبز او ما شابه ..

مهفّة
زمان ما كان في كهرباء وهوّايات ومكيفات. كانوا الناس يستعملوا المهفّة عشان يهفّوا الهواء امام وجوههم. ما زال بعض الناس يحملها كشيء فولكلوري او من باب العادة.

هاي ذاني وهاي ذاني
يعني أمرين متشابهين. وأحيانا تحايل على صفة معينة. مثال: شخص بقول انه غير مغرور ومش شايف حاله وما عندو كبر او شوفة نفس. انما هو اعتزاز وكبرياء من النوع المحمود. طبعا في ناس بشوفوا انه هذا امر عادي ومسموح به وليس تعالي على الناس. ونوع اخر يقول انه هاي ذاني وهاي ذاني يعني الاعتزاز بالنفس هو نوع من التكبر على الناس وما في فرق.... وهلم جرا

الله يصبرك يا صبري ..
او : الله يجيبك يا طولة الروح. نفس الاشي.
  
سهرات البيادر
قبل لا يكون تلفزيون وحاسوب وكل التطور اللي منعرفه اليوم كانت مشهورة سهرات البيادر والسهر على ضي القمر . ساق الله هذيك الايام ...

يا مندرا
من مصطلحات ختيارياتنا. يعني يا ريت. ان شا الله يتحقق..

زيت ورب رب وزيت
كانوا زمان يوكلو كثير زيت ورب. طبعا زيت زيتون. الاكلة بعدها موجودة لكن بفعل التنوع اللي نشهده اليوم فقدت من تميزها. وكانوا لما بدهم يوصفوا التكرار يقولوا : رب وزيت زيت ورب ...

على رَواق
يعني ع الهادي. ومنها رايق يعني أعصابه هادية. مثال: قعدة على رواق او نقاش على رواق ... وهكذا

الزمن الأول
آآآآه على الزمن الاول. ساق الله الزمن الاول. هذي من العبارات الدارجة على ألسن الكبار . ومنها يقال مثلا : الزمن الاول حوّل بمعنى راحت ايام زمان مع كل تبعاتها. يعني مثلا واحد بقولك بعنجهية انا ابن فلان بتقولو : زمن الاول حوّل.. واليوم كلنا مثل بعض.

كلمة وردّ غطاها
يعني كلمة بتّ ما في بعدها نقاش. وايضا بمعنى الاختصار وعدك اللّت والعجن. مثال ترسل ابنك الى شخص وبتقلو احيله هيك هيك كلمة ورد غطاها. او واحد يطيل عليك بالشرح طالبا منك شيء معين فتقوم بتنبيهه قائلا خلص كلمة وردّ غطاها المسألة هيك هيك بمعنى تم البت في الامر ورُفع القلم وما في حاجة او فايدة من الاطالة.

نجم سهيل
نجم سهيل يظهر في بلادنا لفترة محدودة وفي شهور كان يعرفها أجدادنا لكثرة تأملهم المشهد السماوي والأجرام السماوية. وهو نجم جميل كان أهلنا يحبوه ويتغنوا فيه ويستعينوا فيه لتحديد الجهات والوجهة. واشتهر في الأغاني والسهر على ضوءه الوهاج وما زال ذكره يجلجل في الذاكرة.

عاوزك بموال
حكي ختياريات حارتنا. لما بدها اياك في شغلة بتحكيلك: عاوزك في موّال !

كل بلد وسبرها
برضو مثل حاجات. بمعنى كل بلد وطباعها وعاداتها الخ

كاس على كل الناس
يقال عن الموت انه كاس على كل الناس بمعنى كاس يشربه كل الناس ومكتوب ع الجميع ونهاية كل حي. ويقال في النوازل والنكبات وساعات الضيق انها ستصيب الجميع يوم عليك ويوم ع غيرك ..
  
غاب وجاب
او غاب السبع وجاب. يعني غاب عن الدار ورجع حامل قوت ورزق وهدايا وصيد ..الخ

مكتّة / متكّة
المكتّة بالفلسطيني هي منفضة السجاير . وتلفظ في القرى والريف بحرف التشاف "متشتّة". ولان لفظها صعب ابتدع الفلسطينيون كعادتهم كلمة موافقة من نفس الاحرف. متكّة. وتلفظ بالكاف وهي بالطبع اسهل للفظ .

في بيننا عيش وملح 
 دلالة على القرب والمودة. العيش هو الخبز . وعندما نأكل سويا نصبح اهل ولا نتخاصم .

قلّع شوكك بايديك : تقال في اكثر من سياق: ان يدبّر الشخص اموره بنفسه لانه ان لم يفعل لنفسه لن يفعل احد من أجله. وسياق آخر: تقال عندما يواجه شخص امرا لوحده بعد ان تخلى عنه الاخرون او غدروا به او أداروا له ظهورهم قائلين: قلّع شوكك بايديك. يعني دبّر حالك!

حط قبل ما تنطّ ...
 يا بتحطّ يا بتنطّ : هو شرط مسبق. معناه اما ان توافق على كذا وكذا او تذهب ولا يكون اتفاق او توافق.

اللي بدو يعطي بعطي: الانسان اللي بعطي من قلب ومن نفس ما بحتاج حد يطلب منه انما هو بعطي لحاله لمن يستحق لانه كريم النفس. لذلك لا تلحّ على الناس بالطلب لانه اللي بدو يعطي بعطي لحاله مش بحاجة لرجاوة من حدا.

هوّنها بتهون.. بسّطها بتبسَط..  سهّلها بتسهل... وصعّبها بتصعب

اللهم اني صائم
العبارة دارجة خصوصا في رمضان لكن اتسع معناها وسياقها ليشمل مغازي اخرى.  بالاصل شخص يتعرض لموقف في رمضان مثلا نقاش حاد مع شخص آخر ف بمسك حاله لحتى ما يفلت لسانه ويفرط صيامه لانه السباب والشتائم ممنوعين في رمضان. يقول اللهم اني صائم حتى ينسك أعصابه ويوحي للطرف المقابل بانه غير معني بتسخين الموقف حفاظا على صيامه. وفي سياق اوسع: احيانا شاب مثر بشوف صور فاضحة او سافرة لفتيات لابسات من غير هدوم! فبدلا من اطلاق لسانه بعبارات غزل وما شابه يقول: اللهم اني صائم ! في ايحاء واشاره الى المنظر الذي استنفر غرائزه .....

جميلُه سابق .. معروفُه سابق : اي معروف الانسان سبق ويستحق مقابلته بالمثل. مثال: لما بتطلب من حد غرض بحكيلك: معروفك سابق يعني انت سبق وعملت معي معروف وتستحق مني رد الجميل بدون مقابل او جميلة.

وَلا هو داري بحنّا العرايس :
 حد غافل عن شغلة ومش داري شو اللي بصير. طبعا في الغالب امر بتعلق بيه لكنه غير متنبه الو . زي اللي غافل عن حنّا العرايس.. ويقال: ولا داري سعر الذرة بيش للتدليل على الانسان الغافل والغشيم..

خير يا طير
 لما شخص بقولك بدي اطلع مشوار على المحل الفلاني بتسأله: خير يا طير يعني لويش بدك تروح. او واحد بدو منك امر معين وانت مالك خاطر بتحكيله: خير يا طير يعني شو بدك فيه ؟

احنا منعمل اللي علينا والباقي على الله : حث وتحريض انك دايما تعمل اللي بتقدر عليه والباقي على الله..

صار تمّ وجرى :
 عبارة مختصرة خلال الحديث لوصف شيء حصل. مثال: بتحكي قصة لشخص وبتوصل لمشهد طويل فبتقول: فلان حكى لزوجته شو صار معاه قالها: صار تم وجرى. في الغالب بتكون القصة معروفة وما في حاجة للتكرار .

طباخ السمّ بذوقه .
. أي اللي بشتغل بالطبيخ لا بد يذوقه والذي بلفّ دخان لا بد يدخّن وهكذا.. سأل الضابط أحدهم ليه بتلفّ دخان بتعرفش انه ممنوع؟ قاله : طباخ السم بذوقه يعني حتى طباخ السم بذوقه واحنا بنشتغل بالدخان كيف ما ندخن ...

ما بقع الا الشاطر .
. وما بغرق الا السبّيح الماهر .. وما وقعة الا وقعة الشاطر .. ربما لانه الشاطر واثق من نفسه اكثر ولهيك بغامر وبقامر وبجازف فبتكون احتمالات وقوعه اكثر

ولما واحد بقع في مصيدة احتيال او غش او مكر او كيد او لعبة يقال له : تعيش وتشوف غيرها

ولما شخص معاه مصاري ربح في اليانصيب او في صفقة او أجاه ثراء من مكان غير متوقع او تحسن وضعه اكثر ولما بيجيك هدايا او عطايا او امتيازات ايا كانت من اكثر من مصدر يقال :  يقال : زود عزّ و زيد الخير خيرين

والمشاكل كثير مرات بتيجي مع بعضها. تبقى في مشكلة بتصير بالف. بتخلص من مشكلة بتيجيك غيرها. ويقال ايضا: بتخلص من مشكلة بتيجيك احسن منها! ما بتلحّق تحلّ مشكلة الا وانت واقع في غيرها. يقال: خراب الديار او خراب البيوت او خراب البيت بدو مواقفة. يعني بدك تظل واقف على جريك تحل مشاكل. ومرات يقال كأضافة : وياما تشوف.. يعني هذا مش أخر المطاف ياما تشوف مشاكل. راح تظلك تواجه مشاكل كل حياتك لانه هاي سنة الحياة.

ولما بتيجيك بشارة خير او تحل مشكلة كانت مثقلة على كاهلك وبتنزاح عنك مشكلة يقال: همّ وانزاح عن قلبي. او جبل وانزاح عن ظهري.

وكثير مرات اللي بوكلها شخص فقير بكون لا الو شبك ولا عبك. لا الو ناقة ولا جمل بالمشكلة لكن بتيجي الدقّة بيه يعني هو اللي بتلقى العقاب. فيقال: بتيجيش الدقة الا بالرجل الفقير

الخاين بخوّن ... لانه الخاين بفكر كل الناس خاينين مثله

كل عين والها نظرة : مرات بتعمل الشغلة مرة ومرتين وثلاث وما بتزبط معاك. بيجي واحد بعملها من اول مرة. احيانا مش لانه محترف انما لانه كل عين الها نظرة بشوف أشياء الا انت ما شفتها او انتبهتلها. ومرات انت نفسك بتعمل الشغلة ثاني مرة وبتشوف امور اللي ما شفتها اول مرة. لهيك يقال كل عين والها نظرة لانه كثير مرات بنظرة ثانية وثالثة تتضح الامور اكثر

سلامتك وتعيش : واحد خلّص كل المصاري اللي معه بحكي انه اشتريت هيك وهيك وهيك وسلامتك وتعيش ما ظل معي ولا ليرة. او في اي سياق مشابه لما نستوفي قائمة الاشياء وسلامتك وتعيش..

عجكتهم غير شِكِل.. او عجكِتهم غير عن الناس : في ناس كل فعل الهم عجكة وطنّة ورنّة وشوفوني يا ناس لازم يعملوا الاشياء بشكل مختلف. يقال: عجكتهم غير شكل او غير عن الناس. والمعجوك انسان مغرور بحب شغل شوفوني يا عالم. في الغالب مش شوفة نفس انما لانه شايف حاله ومعجوك في حاله ومعجب في حاله. طبعا يمكن كتابتها معجوق. لكن اهل فلسطين خصوصا الفلاحين بلفظوا القاف كاف في الغالب. قاف مخففة.

أهل السماح ملاح : عند النزاعات يحث الناس أطراف النزاع على التسامح ويحدثونهم عن مآثر الحلم والتسامح فيقال فيما يقال: يلا تسامح يا زلمي أهل السماح ملاح

في الأعراس الفلسطينية يقسم المعازيم (المدعوين) الى قسمين أهلية وهم أهل العرس ويشمل دائرة القرابة درجة اولى وثانية والجيران والأصدقاء والمقربين، مقابل الغُربية وهم المدعوين من قرى أخرى وعائلات أخرى. فيكون إعطاء الاولوية للغرباء في الضيافة وتكريمهم بالتحية وتخصيصهم في الغداء او العشاء. والقيام عن الكرسي او فراش الضيوف ليجلسوا وهكذا. فيما البقية يعتبروا أهل العرس ومقربين (أهلية) وهؤلاء ما بحتاجوا لعزيمة بل يخدموا أنفسهم بأنفسهم ويشاكوا في اكرام الضيوف.

طَقّ بند العباه : العباه هي العباءة او الدماية وكلما كانت فاخرة دلّت على الأبهة. والذي يرتدي العباه حين يكون لها بنود بتشوفه بطق بند العباية بخيلاء فيسمع صوت البند وينتبه الحضور الى العباية وصاحب العباية.

قحبة وقلبها رقيق
القحبة بتعمل السبعة وذمتها لكن بتلاقيها كثير مرات حنونة . يقال مثلا عن شخص بعمل العمايل لكن بتطبّ فيه الحنيّة والرأفة لما بشوف واحد بتعرض لظلم. مثال: دولة تنتهك حقوق الانسان وفي الوقت ذاته تستنكر ذلك على الاخرين.

ويا قحبة مع مين علقتي
مثال: شخص علق مع ناس لسانهم زفر وسافل.. مجرد حكى معهم ويا قحبة مع مين علقتي! لقي حاله علقان معهم بلّشوا يسبوا ويشتموا ويصرخوا بدون توقف ..

يلا السلامة وهداة البال
يعني تا ييجي وقته.. مثال: واحد بسأل عن شخص مسافر وين ناويين تعملوله العرس بحكوله يلا السلامة وهداة البال تا يرجع بالسلامة الاول وبعدين الله بهوّنها لما ييجي من السفر والله كريم .. تا ييجي الصبي ومنصلّي ع النبي ..

عليّ النعمة
وكمان: عليّ الطربوش! قَسَم . حلفان يمين بالنعمة او الطربوش او غيره. واحد مثلا بحلف على رغيف خبز بما انه الخبز نعمة ..وهكذا

حِلّ عن سماي
وفي رواية أخرى: اشلحني! يعني اتركني بحالي

أجاه عقل الخمس دقايق
مثال: شخص أجاه عقل الخمس دقايق وفقد صوابه وبلّش يتصرّف بشكل عشوائي ...الخ

وين ما رايحين الهمّ لاحقنا ... شاردين من الهمّ والهمّ لاحقنا
وفي سياق مشابه يقال: رضينا بالهمّ والهمّ ما رضي بينا

دُشّ بهدلة ! يعني بهدلة جامدة !

جاي تسبح في البحر تاعي
تشبه: جاي تبيع مية في حارة السقايين

حاضر غايب
بتحكي مع واحد وهو مش هون. مش معاك. حاضر غايب. يعني حاضر معك بس فكرُه غايب. وخياله سارح ..

اللي خُفت منه صار ... اللي حسبت حسابه صار .. اللي حسبناه لقيناه

اللي بخاف من الغول بطلعله
مثال: اللي بخاف من الليل بصير يتخيل كل شي غول او خطر . وكأنه الغول فعلا طلعله ..


قهوة
لفظ كلمة قهوة تدل على المكان. في وادي عاره تلفظ كهوة. في الشمال والمدن أهوة. في البادية قهوة بالجي مثل  go .. والدروز والعلويين بلفظوها قاف عميقة..
يعني كما يقال عند أهل البادية : البعرة تدلّ على البعير ...

في قرى طولكرم مثل قفين وغيرها لاحظت بعض الفروقات الطفيفة في اللفظ عن وادي عاره. أعطي بعض الامثلة :
  حْروري : انسان شريف او عامل حاله شريف
  بخّاخة : نومة . بدي اعطيها بخاخة يعني بدي انام او اعطيها نومة
  تكشّفنا : يعني انشكف امرنا او انفضحنا
والكثير

الله فوق وهو / هي تحت
انسان غالي عليك بتقول : الله فوق وهو تحت

الصوت بالليل بجاوب
هذي معلومة. لكن برضو الجملة متداولة. الصوت بالليل بعطي صدى. وكمان يُسمع من بعد لانه في الليل درجة تركيزنا وسمعنا بتكون عالية بسبب أخطار الليل فيقال انه الواحد بحسّ بكل هَسَفِة يعني كل حركة خفيفة. وخلال الحديث يقال لشخص مثلا : سمعتكو امبارح وانتو تتخرّفوا كان صوتكم عالي وواصل لعنّا .. طبعا لانه الصوت بالليل بجاوِب .

اللي جبتيلي اياه يا ام رقعة تع خُذيه !
وفي رواية اخرى : اللي جبتيلي اياه يا ام الشراميح تع خذيه .....
مثلا واحد محمّل الله جميلة لانه عايش ! كل يوم بتسمع منه كلام زي جبتلك هيك وجبتلك هيك. او بهدّدك انه راح يبطّل يجيب اغراض. متداولة اساسا داخل العائلة. وتحديدا بين النسوان. بتحكيلها او بتحكيله المرأة في هاي الحالة : اللي جبتيلي اياه يا ام الشراميح تع خذيه !! والشراميح طبعا هي الخِرق البالية دلالة على الفقر .

قالو للديك صيح قال كل شي بوقته مليح
مثلما يقال: كل شي بوقته حلو ... 

قطّارة ...
القطارة هي قطرة العين بنقط فيها الوجعان قطرة قطرة. وهيك يقال مثلا عن سيارة اقتصادية بالبنزين: قطارة. او شخص بدو يوزّع وقته ع القطارة يعني يستغل كل دقيقة ... والكثير

ما شفنا خيره من شره
مثلا شخص جديد في وظيفة ما تحكم عليه بسرعة قبل لا تعرف خيره من شرّه ..

الشمس فضّاحة
مثلا قصّار يشتغل بالظل ما راح يظهر الخطأ مثل بالشمس. لانه الشمس راح تكشف الاخطاء. وفي داخل البيت مثلا ما بتشوف الغبار بوضوح الا لما بكون قبال الشمس... وهكذا

avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:49 pm

عمل له وجهه خريطة !
قاموس الحارة غني كثير .. والطواش زمان كانت كثير مرات تنحسم بعد حرب شلاليط سريعة ! يقال: خربط له وجهه او عمل له وجهه خريطة وهشّمه ودّوَر له نيعه .... والكثير . وقد كتبت عن هذا في بوست منفصل على صفحة دارنا.

سمين
كثيرة هي المرادفات لكلمة سمين منها مضحكة. يقال: ناصح. سمين. دحبور . مدحبر . . ملزلز . وافي. مدوّر ... طفل مُكبّر .. دبدوب . ديناصور . بغل . ثور . عمّال... والكثير

شوفته ومليون دولار بتسرّش البال
واحد اللي ما بتطيقه بتقول : شوفته وسيارة دولارات ما بتسرّ البال ..  أعطيني اياه مع شاحنة دولارات بقولك شكرا

شباب زي الكباب
مصطلحات قهاوي. ما شا الله عنهم شباب زي الكباب ..

قريد العش /  اخر العنقود
أزغر واحد بالدار . طبعا بكون مدلل . ومخبر لامه وابوه ... والكثير

دَهمَشِة
شغل دهمشة يعني شغل سريع وعشوائي ومش مزبوط ..

تناوُل !
دارجة في الاعراس. بكتبوا بالدعوة في مكتوب العرس: ولتناول طعام العشاء على مائدة العريس...الخ. من هون اشتقت كلمة (تناوُل) لحالها بمعنى عشاء. يقال مثلا: فقرة التناول كانت ممتازة !! خصوصا انه اهل القرى بروحوا على العرس عشان يوكلوا ! لا بمزح ....

ابو زيد خاله
مثال: الحياة في القرى صعبة واحيانا مستحيلة. بدك أعصاب من حديد. جهل وتحجر وأشياء بتعيد على نفسها. واللي بقدر يعيش ويصمد بالقرية بكون ابو زيد خاله ! المقصود ابو زيد الهلالي بكون خاله وفي سياق اخر سيدو! طبعا الكلام مجازا . يعني بس واحد أخو أختو اللي بتحمّل صدمات ! او كما يقال شخص ضد الصدمات !

للظروف احكام /  للضرورة احكام
مثال: انت متعود تعمل شيء معين لكن تتوقف بسبب الظروف موضحا: للظروف أحكام. يعني للظروف قوانينها وكثير مرات بتكون الظروف اقوى منك. كذلك الضرورة في الها احكام. في سلّم أولويات وفي شيء ضروري اكثر من اشي. 

من عاشر القوم اربعين يوم صار منهم ..
من رافق القوم أربعين يوم صار منهم والا رحل عنهم .. ويقول المثل الامريكي تشبّه بالناس بتصير منهم .. قانون من عاشر القوم قانون قروي معروف معناه انه الشخص لما بيجي على ناس او على بلد وبختلط بيهم راح يصير منهم اول على اخر . وبعد اربعين يوم او المقصود بعد فترة ليست طويلة راح يصير واحد منهم لانه هذا الوضع الطبيعي والا أصبح منبوذ او على الاقل غير مرحب بيه وراح يظل منعزل عن الناس بحكم انه متكبر عليهم او ما بده يحتك بيهم او يتشبه بيهم الخ. ومن الافضل في هاي الحالة انه يرحل عنهم ويروح لعند ناس مثلو ..

عيار الشبعان اربعين لقمة
والرقم اربعين الو دلالة في هذا المثل ايضا. الرقم 40 رقم معتدل لا هو كبير ولا زغير انما رقم وسطي ومتوازن وطبيعي. مثلا جيل الاربعين هو جيل البلوغ يصبح الشخص محسوب على الكبار . وذكرنا من عاشر القوم 40 يوم . وعيار الشبعان 40 لقمة. معناه انه 40 لقمة هي الوضع الطبيعي لحتى الانسان يشبع غير مفضل أقل من هيك وغير مفضل اكثر من هيك. مثال: ضيف يحضر الطعام ويتزود بمعنى يشارك في الطعام ببضع لقيمات يقال له من باب حضه على الاستمرار في الاكل: عيار الشبعان 40 لقمة..

اللي بحظر الزاد بتزوّد ..
شخص اجا على ناس بتناولوا الطعام لازم يشاركهم. طبعا راح يعزموا عليه مباشرة وهو من طرفه لازم يستجيب وما يفشلهم لانه اللي بحضر الزاد بتزوّد.. هذا من باب التكافل والتعاضد بين الناس في المجتمع القروي ولحتى ما يشعر المضيف انه طعامه لا يُؤكل ... ومن باب التراحم يوم انا معزوم عندك ويوم انت عندي وهكذا. وطبعا عابر السبيل معزوم على الطعام وكل من يدخل عليك سواء غبة اي على حين غرة او بميعاد كله يحضر الطعام..
وفي نفس السياق يقال: اللي بحظر السوق بتسوّق .. يعني اللي بلحق السوق بتسوّق

اللي بحضر عنزته بتجيب توم ..
يعني اللي بحضر ولادة عنزتو بتجيب توم .. المقصود اللي بدير بالو على عنزتو وبكلفها زي ما لازم بتعطيه نسل وحليب .. 

خالص كازه
وفي رواية ثانية: شاطب. والجمع مشاطيب. المقصود شخص معتوه خالص من العقل. يشبه البابور اللي خالص كازه طبعا ما راح يشتغل بدون كاز . وهيك الشخص اللي خالص كازه ما راح يشتغل عقله..

محسود /  ضربته عين
العين او الحسد حسب الدارج عنا ممكن تضرّ وتؤذي انسان بشكل قاتل في الكثير من الاحيان. المقصود عين الحسود المشهورة بالفولكلور الشعبي. يقال مثلا: عين الحسود مقلوعة بعود. دلالة على خطورة الحسد. وكثير ناس بحطوا آيات قرآنية على الحيطان برّا الدار وجوّا الدار او بكتبوا اشياء ضد الحسد وبعلّقوها ع الحيط او بنقشوها على المدخل ..وهكذا. وعلى مستوى الشعوذة في القرى ما بحبوا اللي بتطلّع عليهم بنظرة فاحصة وممعنة يعني بالعربي واحد يبحّر فيك او يصفن فيك. النظرة هاي غير مقبولة اولا. وثانيا ممكن تكون نظرة حسود ووقتها ممكن فعلا انها تكون قاتلة او تسبب أذى فوري!! يعني مثلا مرأة حسودة ممكن في نظره ممعنة، بمعنى انها تتمعّن الشخص مليح، ممكن هذا الشخص يسقط عن سقالة او شجرة او سطح بيت او برندة او اي مكان اخر !! لهذي الدرجة خطورة الحسد وعين الحسود. لهذا يقال احيانا اذا انسان حصل له شيء معين انه ضربتو عين !! يعني محسود !
لا ادري اذا الامر الو علاقة باللي وصلنا عن العين الزرقاء او الخرزة الزرقاء عند الكنعانيين (الفلسطينيين القدامى). علامة العين الزرقاء على اليد وصلتنا من الكنعانيين. والها علاقة بالحسد واشياء اخرى بعدني ما درستها كفاية. يقال انه الخرزة الزرقا تحمي من الحسد او شيء من هذا القبيل.

لاني فقير ما حدا بسمعلي
مثال: نبهت الناس من أشياء معينة لكن ما حدا سمعلك او ما حدا انتبه. وبعد فترة تحقق اللي نبهت منه فتقول : نبهت مرات ومرات بس انا لاني فقير ما حدا بسمعلي ..
ويقال في نفس السياق: اللي سحبناه صار . بمعنى انه ما توقعناه تحقق..

الحياة مدرسة
الحياة مدرسة بنموت واحنا نتعلم .. وأعظم مدرسة هي مدرسة الحياة. تقال في كل سياق. مثلا واحد صار معاه شغلة غير موقعة وتسبب له ضرر بحكي: يلا الحياة مدرسة. بنعيش وبنشوف غيرها.

بعده ع البر
يعني لسا بعده على شط النهر او شط البحر ما تغمّق ولسا في مجال لعدم التورط ولأنقاذ الموضوع. ما معناه شخص ما زال في اول الطريق وما زال في مجال انه يتراجع وما زال الضرر قابل للاصلاح. مثال شاب خطب صبية وخلال فترة قرر يدشّر من باب انه ما زال على البرّ او على الشط ما في كتب كتاب ولا عرس والعلاقة لسا في اولها..

صبرنا ونلنا
مثال: أهل يبحثوا عن عروس لولدهم شافوا ونقدوا كثير لكن صبروا لحتى يلاقوا طلبهم ولما لاقوا العروس اللي بدهم اياها قالوا: صبرنا ونلنا. يعني بعد الصبر نلنا مرادنا. وتنطبق على اي سياق اخر .

الك يوم يا ظالم
الظلم ما بدوم والباطل ما بدوم ولا بد من يوم يقع الظالم وينال عقابه من الله او من العبد مهما طال الزمن. ويقال كل كلب بيجي يومه. وأعجبني بيت شعر للشافعي يقول: تنام عيناك والمظلوم منتبه..يدعو عليك وعينُ الله لم تنمِ

جراميع
نبتة عليها ثمر كثير واضح للعيان. يقال ما شا الله جراميع. ويقال: ما شا الله هالشجرة كَسِر وتلفظ عند الفلاحين بالتشاف. بمعنى انه الغصن بدو ينكسر من كثر الحِمل..

لما بدك اياهم بتلقاش ولا حدا
ولما بدكش اياهم بتلقاهم كلهم حواليك وبتتعرقل بيهم ! لما بتحتاج الناس فجأة بختفوا ! مع انهم قبل شوية كانوا عندك ومع انهم كل يوم بوجهك ومع انهم دايما بيجوا بدون ميعاد. لكن قانون النحس بقول انه لما تحتاجهم ما بتلاقي حدا ...

عينك عينك
يعني بوقاحة. واحد بكذب عينك عينك يعني بكذب وهو يتطلع في عينيك. وواحد بنصب وبخادع وبسرق عينك عينك يعني أشكرا بدون حياء ولا خجل. وما أكثرهم البلطجية هذول..

يا جوختي ..
طائر البُيّض اذا حد ذاكرو. بشبه الرقطي بس لونه على بياض. طائر بري متواجد في بيئتنا في وادي عاره. كنا نسمعه واحنا زغار لما كان ما زال في شجر كثير حوالين البلد كان ينشد بلحن حزين كأنه يقول: يا جوختي يا جوختي .... والسبب طبقا للرواية القروية انه الطائر أضاع جوخه وتصغيرها جوخته اي هندامه الجميل وما زال يبحث عنه منشدا : يا جوختي ...
مثال لاستخدام العبارة : شخص انتبه وصحي على حاله بعد فوات الاوان وصار يقول يا جوختي .... واحيانا تحذر شخص من مغبة امر معين ملفتا نظره بانه راح يصل الى وضع يندم وبصير يقول يا جوختي.... في اشارة بانه الانتباه الى الامر في الوقت المناسب خير من الندم المتأخر ..

الشرادة من المجانين شجاعة
هذا مثل انا بستعمله في اشارة انه الجدال مع المجانين والمعاتيه والمشاطيب والعنيدين والمبرمجين ع الفاضي. وملاحقة المجانين فيها خطورة عليك. ومش راح تصلحهم. الأفضل أهرب. الشرادة ثلثين المراجل. والشرادة من المجانين شجاعة.

بعد العِشاء إفعل ما تشاء !
خمس صلوات للمسلمين باليوم آخرها العشاء. بعد العشاء بكون المسلم طليق من الصلوات لحد الصبح وبقدر يطلع مشوار او سهرة بحرية بدون التزام بالوضوء والصلاة. مع الزمن درجت عبارة بعد العشاء افعل ما تشاء في اشارة مبالغة انه بعد العشاء مسموح تعمل كل شي وكأنك في حلّ من الفرائض..

فش اشي بعيد ع السيارة
عصر السيارات جاب معه مصطلحات جديدة. لما بحكوا مثلا عن بنت متجوزة بعيد عن اهلها في بلد ثانية ، اليوم بطّل في مشكلة مسافة لانه ع السيارة ما في اشي بعيد.

فش اشي مهجّن عنه...
وفي رواية اخرى: مش بعيدة عنه. فش اشي عليه هِجنة. يعني بعملها. ممكن يعمل اي اشي. مش بعيدة عن وجهه !
 مثال شخص متهم في اشي شاكين انه عمل عملة لانه الو اسبقيات ومش غريبة عليه.

ايديه طايلة
يعني واحد الو علاقات مثل واسطة ومحسوبيات. وممكن كمان تكون ايدو طايلة في البنك عشان معه مصاري..الخ

على الصنيّة
حكولنا الختيارية انه مرق زمان على عرعرا كانت البنات في البلد قلة وصار طلب كبير على البنات لدرجة انه لما تولد لاحدهم بنت كانوا يطلبوها وهي على الصينية اول ما تولد ... وطبعا الاولوية لابن العم والقرابة.

ظابب خيرُه وشرّه
يعني شخص ما بيجي في حدا. بمشي الزيق الزيق وبقول يا رب الستيرة.. ظابب عن الناس خيره وشره بجيش بحدا ولا حدا بيجي بيه. صباح الخير يا جاري انت في حالك وانا في حالي..

عُمر الدم ما بصير مي
او كما قال الشاعر : دم القربى وان كان ظالما عزيزٌ علينا ان نراه يسيلُ. دم القربى يعني القرابة ولا مرة بصير مي. في اشارة الى قوة العلاقة العصبية. ويقال في نفس السياق: ما حدا بسفط اللي الو . وما حدا بقسُم باللي الو . يعني حتى لو كان الاخ وابن العم والقريب ظالم لكن وقت الامتحان الصعب او وقت ما يتعرض لخطر او شدّة او ضيق قرايبه واهل بيته ما بسفطوه يعني ما بتخلّوا عنه وما بهون لهم يشوفوه في ضيق.

بفهمها ع الطاير
وفي رواية اخرى بلقطها على الطاير .. يعني بفهم الاشي بسرعة. بلقط الكلمة وهي طايرة في الهوا قبل لا توصل ! او كما يقال : اللبيب من الاشارة يفهم .

ان اجت غنّت وان ما اجت غنّت
يعني شخص مش فارقة معاه. ان اجت غنت وان ما اجت غنت. ان زبطت وان ما زبطت كله واحد. مثال شخص بشتغلش يقال مش فارقة معاه ان اجت غنت وان ما اجت غنت.

ماظلّش من العمر قد اللي مضى
عبارة متداولة عند الكبار بمعنى انه ما بقى من العمر قد اللي مضى.

الجار قبل الدار .. والجار ولو جار
تقال في أهمية الجار . اسأل عن الجار قبل الدار . ويقال ايضا جارك القريب ولا أخوك البعيد. لانه الجار كل يوم بوجهك ما الكم مفر من بعض. حتى لو جار يعني ظلم برضو بظل جار ما منه مهرب. مهما كان بظلو جار ..

الجاهل عدو نفسه
طبعا شارح حاله. الجاهل بجيب لنفسه ولغيره متاعب ووجع راس.

الجايات اكثر من الرايحات
مثال: شخص دعوه لفرح وما قدر يروح بسبب ظروف. بعد العرس بروح يهني العرسان وبقولهم: يلا الجايات اكثر من الرايحات ان شا الله منشارك بافراحكم الجاي...

جعجعة فاضية بدون فايدة
الجعجعة واللعلعة والصراخ وكثر الحكي غالبا ما بجيب نتيجة وما بيجي محل الفعل. كل جعجعة بدون فعل بتظلها جعجعة بدون فايدة.
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 3:51 pm

دواوين
الكلمة رائجة في القرى. مفردها ديوان. يقال عن شخص انه ديوانجي و تبع دواوين..الخ. الكلمة من شقين: ديوان + جي. معناها: تبع دواوين او رجل دواوين. ال جي تركية تضاف الى الكلمة كصفة انتشرت في فترة الحكم التركي على البلاد. مثلا: كهربجي= تبع كهرباء او كهربائي. مواسرجي. كندرجي. قصبجي. قهوجي..الخ. و ديوان هو المكان اللي كان يجتمع فيه أهل البلد خصوصا الكبار والو اهداف عدة. بحكوا عن اخبار البلد وقضايا البلد وبحلوا مشاكل وبستقبلوا ضيوف ويجتمعوا وقت الافراح والاتراح والمناسبات وتناول قضايا ملحة الخ. وطبعا خراريف ومغامرات وقصص وبطولات ومقالب ولعب سيجة ومسامرات على وقع فنجان قهوة الخ الخ. والموضوع لا يخلو من القصص المبالغ فيها. عموما اهل القرى يميلوا الى التضخيم والتهويل. ولما فش اخبار جديدة في الديوان يدور الحديث عن امور اخرى أقل اهمية ويعاد تكرار واجترار الحديث مع شوية تتبيل وبهارات وزيادات وتهويل. من هون صارت عبارة حديث الدواوين يقصد فيها ايضا الكذب. لما يقال ديوانجي هي في الاصل رجل دواوين بمعنى شخص يرتاد الدواوين ويشارك في حديث الديوان ومرات بحكي قصص ع مزاجه ممكن جدا يكون فيها تكرار ومبالغة وحتى كذب. صارت كلمة ديوانجي مع الزمن مرادفة لكلمة كذاب او رجل مقالب. اهل القرى بحبوا المقالب. لانه فيها كثير تسلية في عصر لم يكن تلفاز ووسائل ترفيه المعروفة اليوم. المقلب كان أشبه بكاميرا خفية. بتسلبطوا على شخص بمسكوا عليه راس بكذبوا عليه وبالاخر بعد ما يحرقوا اعصابه بحكوله انه هذا مقلب!! مثل الكاميرا الخفية اليوم. طبعا هذا جزء من الثقافة المسماه دواوين وهي منتشرة في القرى وما زال الها صدى لليوم عند كبار السن. والمقصود فيها زي ما حكينا مقالب ودواوين وافلام كاميرا خفية. وفي كلمة جديدة متأثرة بالعبرية او من نفس المصدر لا اعلم من وين أجت. اللي هي مَتحة. بالعبري متيحا ومعناها مقلب. يقال: تمتح شخص. يعني تخليه على أعصابه. اما اليوم الديوان التقليدي انقرض من قرى عديدة وبقي في بعضها. زرت قرى في الضفة الغربية ووجدت الديوان باقي على حاله. في احدى القرى تجمعنا في ديوان العيلة وانطلقنا من هناك رحنا نجيب العروس. ولما وصلنا استقبلونا في ديوان اهل العروس اللي هو ايضا ديوان العيلة. اما في بلدنا اليوم في كل بيت في ديوان لاستقبال الضيوف وهو بديل ديوان ايام زمان.

من طق طق للسلام عليكم
يعني بالتفصيل. زي واحد بحكي قصة ببدا من (طقطق) على الباب ودخل. يعني من بداية القصة. لحد (السلام عليكم) وهي كلمة استقبال ووداع واستئذان بالانصراف ايضا. مثال: انا راح احكيلك كل شي من طقطق للسلام عليكم.
ودارج في بداية القصة ان يقول الراوي: الله يمسيكم بالخير ... كان يا ما كان يا سامعين الكلام.....الخ. وينهي بالقول: وطار الطير الله يمسيكم بالخير ..

القصة وما فيها
يعني جوهر القصة هو هيك هيك هيك. شرح مقتضب لشيء حصل. مثال: خلال نقاش او جدال او حديث عادي الاول يقول للثاني ليختصر الفكرة الجوهرية او الموضوع المهم يقول: القصة وما فيها انه الولد بدوش يروح ع المدرسة او ما بدو يكمل دراسة...الخ الخ. وتقال ايضا لعدم تهويل الموضوع. كأن تقول: القصة وما فيها انه الولد ما بدو يتعلم في هاي المدرسة لسبب كذا وكذا وما في حاجة لتضخيم الموضوع.

الله يستر من الجايات
تقال لما يكون وضع متأزم ومرشح لمزيد من التدهور . مثال: نزاع معين مرشح للتدهور بسبب أجواء مشحونة يقال: الله يستر من الجايات او الله يحمينا من الجايات ..وهكذا

بنجن وبنحن
والفعل الماضي: إنجنّ وانحنّ. واحد جنّ جنونه لسبب او لاخر .

يا معانا يا علينا
طبعا المعنى واضح. والسياق غالبا لما بكون وضع مشحون بين طرفين او اكثر وما بكون مجال انه تكون حيادي. ثمة اوضاع بكون الشخص مجبور انه يتخذ موقف. يا معانا يا علينا. وتقال ايضا كفعل احتجاجي على هذا الامر كأن تقول: هذا يمّ يا معانا يا علينا ما بعطيك مجال تكون طرف محايد ...وهكذا

والله ما انت قليل
تقال لما تتفاجأ من شيء معين غير متوقع مثل تصرف او شخص يفاجأك بامر غير متوقع. مثال: دخلت انت وصاحبك على محل واكتشفت انه صاحبك الو علاقة طيبة مع المدير وبمون عليه. بتحكيله: والله ما انت قليل...... والامثلة كثيرة.

غاب القط العب يا فار
في غياب القط بوخذ الفار راحته بصول وبجول وبسيد وبميد.. وهيك الحياة. مرات المعلم بالشغل ما بكون موجود والعمال باخدوا حريتهم على مبدأ غاب القط العب يا فار ..

اذا فاتك الضاني عليك بالحمصاني
الضاني هو اللحام. والحمصاني بياع الحمص. اذا فاتك اللحام. يعني مثلا سكرت الملحمة او ما ظل لحم وقتها عليك بالحمص. على اعتبار انه الحمص مغذي وبسد محل اللحمة.

اللي كاتبه ربك بصير
عبارة مجاملة ومواساه وتسليم بالامر الواقع. مثال: انسان مريض بمرض عضال والناس بجاملوا اهله بأقوال من قبيل: اللي كاتبه ربك بدو يصير او اللي كاتبه الله بده يصير . وعموما الانسان المؤمن يردد مثل هذه العبارات في سياقات عدة.

عبد مأمور
تقال في اكثر من سياق. مثال: شخص عمل معك شغلة غير متوقعة. مثال: موظفين من الجباية بيجوا عندك ع الدار يحجزوا اغراض عشان دين معين. بتبدا تشرحلهم انه ما في دين من أصله وانه المسألة كلها نصب..الخ. بحكيلك: انا مجرد عبد مأمور . حتى لو اقتنعت بقصتك مجبور انفذ الاوامر ...وهكذا.

بهاي طينة وبهاي عجينة
لما بدك ما تسمع حكي معين. مثلا حكي مش عاجبك. بتسدّ ذينيك. بتحطّ بهاي طينة وبهاي عجينة...! بالمعنى المجازي طبعا. المقصود بتسد أذنيك وما بتسمع.

شايف الاشي وبكذبه
كان عندي جارنا قعدنا بالحديقة وشاف خضار . بحكيلي انا مش مصدق اللي شايفه. خضار في حديقة زي هاي؟! حكيتله انه هاي طريقة حديثة هدفها كيف تزرع خضار في مكان ضيق غير معدّ للزراعة. لكن جارنا ظل يحكيلي انه لا مش معقول...!! جارنا شايف بس بكذّب اللي شايفه. لا مش معقول. غلط. لا اكيد هذا الحكي مش معقول....!!!

الثالثة ثابتة
بمعنى ان المرة الثالثة هي التي ستقرر وتحدد وتحسم سواء للسلب لو الايجاب. مثال شخص يجرب مرة اولى وثانية ويفشل لكن في المرة الثالثة لو نجح سيثبت الامر ويدوم. ويقال في نفس السياق الثالثة تالفة بمعنى انه اذا لم تزبط معك ثلاث مرات فيبدو انها تلفت ولن تزبط ابدا وفي هذه الحالة أفضل انه تجرّب غيرها.

الثور لما بقع بكثرو سكاكينو
لما بكون الانسان قوي الكل بهابه وبفتل حواليه وبجامله وطبعا يتجنب غضبه. لكن لما بقع الكل بدو ينال منه وينتقم وينهش. كما الثور عندما يقع ينقضون عليه بالسكاكين لينال كل واحد نصيبه من اللحم .

ثقلة دمّو عجايب
يقال في الحواري والحارات عن شخص دمه ثقيل: بس لو يخفف دمو شويّ.. قاعدلي وبتهزّا.. حكيو بايخ.. قعدتو بايخة.. حركاتو بايخة.. وشو .. مفكر حالو دمو خفيف! بتحالى زي الاولاد الزغار.. قال بحكيلي مدني.. مثقف يعني.. وشو شايف حالو.. يعني الك خاطر توكلو.. بتمتّكلي بالحكي زي ال....... باختصار ثقلة دمو عجايب

ثُقلك ع الارض ...
 واحد بحسّ انو ثقيل على جماعتو .. او  اللي مضيّفينو .. بحكيلهم انو مثَقّل عليهم .. بجاوبوه: ثُقلك ع الارض .. كنوع من المجاملة .. كمان لما بتركب مع واحد بسيارة عشان يوَصّلك ع محلّ .. بتحس انك مثقّل عليه .. بقولك هو انا حاملك ع ظهري ؟! يعني قصدو السيارة حاملتك .. برضو نوع من المجاملة .. بس برضو فيها نوع من النخوة ..

التلم الاعوج من الثور الكبير
غلطة الكبير دايما بتكون وِعصة وصعبة. كثير مرات غلطة الكبير بتكون اشنع من غلطة الزغير رغم تجارب الحياة اللي بمر فيها الكبير . المقولة مأخوذة من حراث الارض. كانوا يحرثوا اما على فرس او ثور. عادة ثيران اثنين بجرّوا المحراث. وكثير مرات كان يطلع تلم اعوج بسبب انحراف من الثور الكبير ..

التمّ المتعوس ع خايب الرجا
يعني اثنين ما الهم حظ التمّوا على بعض.. منحوس التمّ على أنحس !

التقوى اقوى
التقوى من التعابير الاسلامية. تقوى الله يعني مخافة الله. والتقوى اقوى من كل اشي. مثال: بيّاع بغشّ البضاعة بحكوله: التقوى اقوى.. اتقّي الله.. وما الى ذلك.

التين لو سِلِم من النواطير بِحَمّل قناطير
الناطور هو الحارس. والمنطرة هي مكان الحراسة. كثير مرات الحارس على شيء هو اللي بنهبه. قناطير = كميات كبيرة.

تا يبيض الحمام ع الوتد ..
او زي ما بقولو عنا بالبلد: قول ان شا الله ! يعني إنسى الموضوع ! تا ينوّر الملح.. المقصود وعد او شيء اللي ما راح يتحقق. لانه ولا مرة واحد شاف عش حمام على وتد !!

تا يطلع الجحش ع الميذنة
نفس معنى المثل السابق. يعني الوعد بتحقق لما الحمار يصير مؤذن !! يعني ما راح يتحقق الا اذا صارت معجزة ..

تا ينوّر المشمش .. او تا ينوّر الملح
نفس المعنى السابق. يعني الله كريم .. ان شا الله بصير خير .. وعد ابليس بالجنة..

تا ييجي الصبي وبنصلّي ع النبي
مثال: واحد بحسب للمشكلة قبل لا تصير . زي واحد بحضّر للولد قبل لا ييجي الولد. بحكولو: تا ييجي الصبي وبنصلّي ع النبي. يعني كل شيء بأوانه. ما تستبق الامور .

تا ييجي وقتو وبيجي مقتو ..
يعني لوقته وبحلّها الحلاّل. يشبه المثال السابق. لما ييجي وقت المشكلة راح نهتم في مقتها يعني بغلبتها.

جار علينا الزمن /  جار علينا الزمان
مقولة مش مثل. دارجة ايضا بالفصحى. ومعناها مفهوم. مثال: خلال حديث عادي عن ظروف الحياة تقول: والله جار علينا الزمن والامور ما مشت زي ما توقعنا والحظ لم يبتسم لنا وحصل ما لم يكن بالحسبان..وهكذا

اللي أعوج قولّو اعوج بعينه
تشجيع على قول الحق وانك ما تجامل على الطالعة والنازلة. انسان اعوج احكيله انت اعوج في نص عينه يعني في وجهه. طبعا هناك حالات لا بد من المجاملة وتهدئة الخواطر حين يكون الشخص المقابل في حالة عصبية زائدة...الخ

ما في اشي من قيمتكم
يقولها المضيف للضيف. لما بتكون ضيف عند حد وبقدّملك الواجب بتحكيله: بكفي يا جماعة انا مش جاي اجرّبكم.. بحكولك: ما في اشي من قيمتك...الى اخر الاسطوانة

خير الله باسط
لما بكون الوضع الاقتصادي مليح. مثلا كان موسم زراعي موفق وخير الله باسط من فاكهة وخضار ...الخ

ما في حد بموت من الجوع
حتى في أصعب الظروف لم يحصل انه مات شخص جوعا في بلدنا لانه في حالات الفاقة والعوز والجدب والقحط والكوارث يتكافل الناس باي شكل. كل شخص بقدر يدخل اي بيت ويطلب مواد تموينية اساسية. طبعا اليوم نمط الحياة تغير والحكي هاذ مش معروف للاجيال الحالية.

ما في حدا راح وأخذ اشي معاه
يعني ما في حدا مات واخذ معاه اشي من املاكه. المقولة تشجع على عدم تكديس الاموال والاملاك لانك مش رح توخذ معاك اشي ع القبر . كل اموالك واملاكك راح يتمتع فيها غيرك. وزّع في حياتك وتصدّق وساعد واعمل مشاريع لبلدك...الخ

ما في حدا راح ورجع
يعني ما في حدا مات ورجع مرة ثانية يحكيلنا شو صار معاه... وفي سياق اخر يقال: ما في حدا راح ورجع. يبدو انهم مبسوطين هناك !! بمعنى انه حياتنا صعبة لدرجة انه اللي بروح ما بدو يرجع ...

سمك ببحر
يعني شيء غير واضح. زي اللي شايف سمك في بحر . مثال: بيعة طواشا بدون لا تشوف البضاعة. بتحكي للبائع: ما بنفع هيك نشتري سمك في بحر ! وفي سياق اوسع: كل شيء غير واضح : سمك وبحر هاذا مش كل ما يخفيه البحر .

خط الرجعة
دايما احفظ خط الرجعة. مقولة دارجة كثير في فلسطين ومن السلوكيات الاساسية. مثال: واحد هاجر من بلده ع بلد ثانية ما بعرف فيها حدا. ممكن يتأقلم وممكن ما يتأقلم ويرجع على بلده. في هذي الحالة لازم من البداية يحفظ خط الرجعة عشان يقدر يرجع على بلده. لانه ممكن يترك البلد في ظروف ما يقدر بعدها يرجعلها.

أعمى قمارهم
قمار جمع قمر . وقمر مظلم او اعمى ما بخليك تشوف. وعَمَيان القمار هو حالة اللي ما بتشوف فيها. مثال: تبحث عن شغلة في بيتك وهي قدامك لكن الله عمى قمارك ومش شايفها..! وهكذا

طقّعلو
وفي رواية أخرى: قدحلو..  يعني طنّشو او طفّشو او ادار له ظهره او تخلى عنه او استنّاه وما اجا..الخ. مثال: تواعدت انت وواحد تروحوا مشوار مع بعض لكن بالاخر طقّعلك يعني استنيتو وما اجا...

تتطلّعش على دموع عينيه، تطلّع على عمل ايديه ..
مثال: عصفورتين ع الشجرة وحده بتقول للثانية تطلّعي ع الصيّاد مسكين بعيّط شوفي دموعُه نازلة .. قالت لها الثانية تتطلّعيش ع دموع عينيه تطلّعي على فعل ايديه ! الصيّاد كان يندب حظّو هذاك اليوم مش زابطة معاه قاعد بعيّط .. فش عصافير ! فش صيدة ! بس البارودة طبعا بايدو ، جاهز ومتأهّب لاطلاق النار ..

التالي غالي .. التالي للغالي
مثال: واحد بوزّع حلوى في عرس. وصل اخر قطعة بعطيها لواحد وبحكيله: التالي للغالي ...

قريد العش
أزغر واحد بالدار . زي أزغر عصفور بالعش. والزغير طبعا دايما مدلل واحيانا الو اكثر من أخوته بالورثة باعتباره حل وسط لانه قريد العش بكون اخر واحد عند امه وابوه وهو اللي بوخذ الدار اللي هي دار امه وابوه... ولانه ازغر واحد دايما الكل بدلّلو ... وهكذا

التكرار بعلّم الحمار
وفي رواية اخرى مخففة: التكرار بعلّم الشطّار.. بالاصل طبعا التكرار بعلّم الحمار . مع الوقت ضافو الشطّار عشان التخفيف صارت التكرار بعلّم الشطار عشان في ناس بزعلو لما تقولهم التكرار بعلم الحمار ..

من عيني هاي لعيني هاي
ذكرني بالمثل محبوب فلسطين والعرب محمد عساف لما طلبوا منه أغنية خلال حفل بيت لحم أشار : من عيني هاي لعيني هاي. يعني من عنيّ. على راسي من فوق. ويقال ايضا: طلبتك أوامر . انت اطلب وعلينا التنفيذ.. أشّر ودشّر ..الخ

الدم على الدم ثقيل /  الدم ع الدم حامي
المقصود أبناء القربى ما بتحمّلوا من بعض نقد او لوم او عتاب شديد اللهجة او زايد عن حدّه هذا من ناحية. والسبب الأعمق هو انه الناس المقربين دائما وأبدا تحتدم بينهم المنافسة العلنية او المخفية الكامنة فتجد ردود فعلهم احيانا تجاه بعض ثقيلة او حامية فيقال: الدم ع الدم حامي.

إبحش جبل بمسمار ولا تفهّم حمار ..
المثل طبعا واضح ومش بحاجة لشرح

أبّع أبّع منشي
عبارات قديمة جدا وصلتنا دون ان نعرف مصدرها. تشبه النقر على الخشب لدرء الأذى وفأل الشرّ الخ. مثال: شخص بمقام أب او أم يدعو على اولاده خلال الغضب فيجيبهم احد الحضور : أبّع منشي. بطلب انه دعواته ما تتحقق. فال الله ولا فالك. بعد الشرّ عليهم.. اي ما يشبه الدعوات المضادة لتبطل الدعوات الاولى.

ابعد عن الشر وغنيلو
دعوة للابتعاد عن الشر لانه الشر يطال كل الاطراف بمكروه وأذى ولن ينجو منه احد.

أبعدلك أسعدلك ..
مثال: أب طلب عروس لأبنه من بلد ثانية مع انه في عرايس عند معارفه وقرايبه. من باب : أبعدلك أسعدلك. فالعلاقات بين القرايب والجيران والمعارف دائما تشوبها الحساسيات الزايدة التي تتراكم لطول العشرة.

الباب اللي بيجيك منو الريح سدو واستريح
مثال: العلاقة اللي بيجي منها وجع راس اقطعها واستريح. وعلى قول المثل: اقلع السنّ واقلع وجعه

البادي اظلم
عبارة دارجة على مستوى الوطن العربي أضيفها هون لانها دارجة كثير في فلسطين. مصدرها: العين بالعين والسن بالسن والبادي أظلم. والامثلة في بلادنا لا حصر لها. على مستوى النزاعات والمشاحنات والحروبات..... تقال من باب الانتقام بقدر حجم الاعتداء على اساس انه المعتدى اكثر ظلما بمبادرته الى الاعتداء.

البدوي أخد بثارو بعد اربعين سنة وقال استعجلت ..
 اخذ ثارو يعني استدّ ثارو وانتقم من المعتدين.. تذكرنا بمقولة الاسى ما بينتسى والدم ما بروح هدر وبشّر القاتل بالقتل ولو طال الزمان واللي راح له حدا يعني انقتل له عزيز بوخذ بثارو ولو بعد حين ... مع التذكير بانه في بلادنا على مر تاريخها مبدأ العقاب على القتل هو : القاتل يُقتل.

البراطيل بتحلّ السراويل ..
البراطيل يعني الرشوة .. برطل واحد يعني اعطيه رشوة .. والرشوة والبقشيش والاكراميات مرات كثير بتعمل عمايلها وبتفعل أفاعيلها وبتنزّل السراويل! .. يعني بتوخذ اللي بدك اياه من الموظف او الناس عموما بالرشوة والهدايا .. بتعطيه اللي فيه النصيب من تحت الطاولة او من فوق الطاولة على شكل هدايا وغيره وبتوخذ حاجتك منو .. طبعا غني عن القول انو هذا من انواع الفساد ..

البطالة بتعلم الهمالة
الهمالة هي الصياعة والدشارة. يقال شخص هامل وصايع وداشر وداير على حلّ شعره عمّال بطّال..الخ. وطبعا من أسباب ذلك قلة الشغل اللي تؤدي الى الانحراف لملئ الفراغ. فراغ الوقت والروح. وأحيانا قلة الشغل توفر وقت لتعلم أشياء جميلة كقول المثل: قلة الشغل بتعلّم التطريز . مع انه كمان هذا المثل في الو سياق آخر : احيانا لقلة الشغل ينشغل الشخص في امور لا حول الله بمعنى صغائر الامور او شغلات لا تتعدى التسلية ..

البُعُد جفا
لما الناس قراب من بعض من ناحية المسافة هذا القرب يخلق حميمية واحتكاك يومي ومعرفة قريبة ولغة واهتمامات مشتركة الخ. لهيك يقال جارك القريب ولا اخوك البعيد. لانه البعد جفا. بُعد المسافة يرافقه جفاء وفتور في العلاقة.

الطيور على أشكالها تقع
مثل معروف على مستوى الوطن العربي يشبه بالمعنى المثل العربي: وافق شنٌ طبقة. والمثل الفلسطيني: طاسة ولقيت غطاها. والمعنى واضح: الطيور تنزل وتجتمع مع أشكالها نوعا وسلوكا الخ الحمام مع الحمام والصقور مع الصقور . وهكذا البشر يجتمعون ويتآلفون حسب النوع والمعتقد والسلوك والعادات والعقليات..الخ.

الله يخليلنا اياها اسرائيل !
هناك فئة من عرب فلسطين الداخل تفضل العيش في اسرائيل لاسباب عدة منها انه اسرائيل بتعطي مخصصات على انواعها مثل تأمين وغيره. اسرائيل بتوفر شغل وحياة كريمة اسرائيل فيها حريات الخ الخ لكل واحد اسبابه. هؤلاء يرددون مقولة الله يخلّيلنا اياها اسرائيل اللي أصبحت شائعة. لا اريد ان اشتغل هنا باحصائيات. مقبول القول انه هذه الفئة تمثل الاقلية لكنها موجودة.
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 4:00 pm

الشرادة ثلثين المراجل
الشرادة من جذر شرد. في الاصل الفعل شرد في اللغة الفلسطينية معناه نجا. نجا بنفسه. والشرادة هدفها النجاة. انك تنفد بريشك. من هون بتقول الحكمة الفلسطينية اللي هي الكنعانية تاريخيا وثقافيا انه اهم شيء الحياة والنجاة. ان تنجو بنفسك وينجو معك من حولك الى حين زوال الخطر . لهيك الشرادة يعني الفرار والهريبة والفليلة وقت الخطر ليس فقط مسموح ولا يقلل من الرجولة والشجاعة بل هو محبذ لتنجو بنفسك وعائلتك وشعبك الخ. من هون اجا المثل الشرادة ثلثين المراجل. المراجل تظهر ايضا بالقدرة على الشرادة والنجاة وقت الخطر . اذ ليس من الحكمة بل هو من الانتحار ان تواجه وجها لوجه من لا قبل لك به.

بتنبلّش الفولة بثمّه
واحد ثرثار . بحكي بحكي بحكي حتى وهو يوكل لا يتوقف عن الحكي لدرجة انه الطعام ما بنبلّ بثمّه ! من سرعة الحكي والثرثرة ! ويقال المثل ايضا عن شخص لا يحفظ السر . لانه كثير الحكي طبيعي انه ما بحفظ اسرار .

روح بلّط البحر
اسلوب تهديد او اسلوب تعجيز في موضوع مفروغ منه. مثال: واحد بعتقد انه ربح المحكمة ضد واحد ثاني. ما راح يهمّه لمين الحق او عمين الحق. لما في قرار محكمة واوراق بايده بحكيلك: روح بلّط البحر . يعني اعمل اللي بدك اياه مش راح يطلع بايدك ومش راح تطلع بنتيجة. زي واحد ببلّط بالبحر !!

اللي نجّينه اجريه
يقال الشرادة ثلثين المراجل. مرات ما بكون امامك خيار الا الفرار . واللي بنجيك سرعة اجريك ! لهيك يقال عن شخص نجح في الهرب من مأزق او خطر محدق: اللي نجّينه اجريه !

محكوم لمرتو
أغلب الرجال (الجيزان بلغة القرية) محكومين لظروف العائلة والزوجة والاولاد. والزوجة او المرا هي ربة البيت. والزوج دائما محكوم لمتطلبات البيت بما انه المعيل حسب قانون القرية. وهيك بكون محكوم لطلبات مرتو بصفتها المدير الفعلي لمتطلبات البيت. او بكلمات اخرى محكوم لمرتو . وبما انه مصلحة البيت والاولاد هي العليا فلازم المرا تعرف كل دقيقة وكل لحظة وين جوزها موجود وهل يعمل في هذه اللحظة لخدمة الحياة الزوجية ام لا .

يا منعيش مع بعض يا منموت مع بعض
اولا كلمة منعيش ممكن تقال ايضا بنعيش. الميم او الباء نفس الاشي. ونصل الى المقولة وهي ليست مثل انما من المقولات الدارجة. تقال غالبا عن العائلة والاصحاب والمقربين. في حال مثلا يحدق خطر بما فيه خطر الموت باحد افراد العائلة او دائرة المقربين فانك لا تتركه او لا تتركهم ابدا حتى لو كان على قطع راسك. في هاي الحالة يقال يا بنعيش كلنا يا بنموت كلنا ..

على راسه ريشة
يعني مميّز عن غيره. عادة الريشة للامراء. الأمير بكون حاطط على راسه ريشة للعلامة. المقصود شخص يحظى بمعاملة خاصة لانه على راسه ريشة او شخص شايف حاله مفكر انه على راسه ريشة... الخ.

الناس مقامات
كل انسان بتصرّف حسب مقامه وأخلاقه وآدابه واسلوب تعامله مع الناس الخ. طبيعي انه كل واحد نتوقع منه تعامل وسلوك حسب مقامه.

الكلمة المليحة طالعة والعاطلة طالعة
ويقال الكلمة الحلوة بتذوّب الصخر وبتطلع الحية من وكرها (موكرها).. والكلمة الحلوة بتطلع الضبع من الموكرة. الكلمة مثل الرصاصة ان طلعت ما بترجع.. الكلمة المليحة طالعة والكلمة العاطلة طالعة اذن ليش ما تقول الكلمة المليحة..

هواتين ع الراس بوجعن
مصيبتين بجين مع بعض بكون الهن أثر صعب على الانسان. معروف انه المصايب بتيجي مع بعض وبتزيد الوضع تفاقم .

احنا وانتو بكل خير
يعني احنا وانتو بخير . اسلوب كلام يحمل أمنية بالخير . مثال: منعمل هيك هيك واحنا وانتو بكل خير .

اللي بشتري وقيّة لحمة بخليها مكشوفة ؟!
مثال: اللي بخطب عروس مش معقول يتركها بدون عناية. مو معقول يتركها مكشوفة بدون لا يحافظ عليها. زي اللي بشتري اوقية لحمة مش معقول يتركها مكشوفة للذبان وغيره. طبيعي انه يدير باله عليها.

ايد على ايد رحمة
تشجيع على التعاون والمشاركة والمساعدة .

صلّي على الحاضر /  صلّي على الموجود
يعني تعامل مع الوضع الموجود زي ما هو عابين يتغير الوضع للافضل.

ريتها نور وبخّور
يعني ريتها مبروكة عليكم العروس او الغرض ...الخ. واحد بطلب منك غرض بتحكيله: على حسابك. ريته نور وبخور . او : ريتها العروس نور وبخور . تشوفوا على وجهها الخير ان شا الله ..

عطيّة ما من وراها جزيّة
لما بطلبوا عروس اذا أهل العروس وافقوا بحكي ابوها لاهل العريس بعد الموافقة : أجتكم عطية ما من وراها جزية ...الخ

حُط غنماتك على غنماتي تا نخلّي القطيع واحد
دعوة الى الشراكة والاتحاد وتكثيف الجهود وتوحيد الصفوف والتوافق والتوصل الى حلول وسط . مثال: مهر العروس احيانا بحطوا المقدم على المؤخر وبخلّوه مهر واحد .... وهكذا

وينتا بدك تنشبك ؟
يعني وينتا بدك تتزوج. تنشبك من شبكة الخطوبة .

شمّر عن ذراعه
التشمير عن الساعد او الذراع للعمل. مثال: شمّر عن ذراعه واشتغل عشان يخلّص حاله يبني ويتجوز ..

ارحم العالم الله برحمك
دعوة الى التراحم ارحم الناس وتساهل مع الناس الله برحمك.

وقع اشي من السما
صار اشي مهوّل كأنه وقع نيزك او جسم فضائي من السما.. مثال: شخص فقير صار مدير مدرسة بتكون ردود فعل الناس كأنه وقع اشي من السما. يعني شيء مخالف للعادة والمألوف.

بخّت فيه حيّة
خلال نقاش مع شخص بتفاجأه في خبر او حكي غير متوقع. يصمت كأنه بخّت عليه حية ..

الخِيّر بوخذ ثنتين وثلاث واربع
يعني الزلمي اللي ع قد حاله بتجوز نسوان ثنتين وثلاث واربع. تشجيع على الزواج وتكثير النسل. خصوصا في وقت الشدائد والحروب والوباء لما بقلّ عدد الشباب وبكون زواج الشاب من اكثر من مرأة حل لمشكلة العنوسة وتعويض النسل اللي قضى بالامراض او الحروب.

بحكي تركي !
مثال: شخص تعصبن وصار يحكي تركي! يعني لغة غير مفهومة ..

هيك طنجرة بدها هيك غطاه /  هيك مكتوب بدو هيك ختم
مثال: فوز شخص في انتخابات يفاجأ فئة من الشعب لعدم كفائته من وجهة نظرها. بستغربوا كيف شخص زي هذا صار رئيس! ولتفسير الظاهرة يقال فيما يقال: هيك شعب بدو هيك رئيس! او هيك طنجرة بدها هيك غطاه.. مثال اخر : شخص يبعث برسالة غير مفهومة فيرد عليها المتلقي بخرابيش قائلا : هيك مكتوب بدو هيك ختم! وهكذا ...

خلينا ننفد بريشنا
مثل: الشرادة ثلثين المراجل .. يقال: نفد بريشه. يعني نجا

كل جديد إلو طنة ورنة
كل اشي جديد بكون حلو والناس بتتهوّسلو . كل جديد بعملولو طنة ورنة ورقصة وزيطة وزنبليطة. مش بس بيت جديد او سلعة جديدة الا كمان مولود جديد وضيف جديد الخ. لكن كل شيء الو وقت وصلاحية وبعد الهوسة والفرحة بيجي يوم بخفّ الوهج والناس يبحثوا عن جديد اخر . امتحان الانسان هو المحافظة على بريقه لفترة طويلة.

رايح على عاره /  رايح ع البلد
اسم البلد يستخدم برضو للاشارة الى مركز البلد . مثلا لما بقول رايح على عاره وانا في عاره! المقصود رايح على مركز البلد .

دكان ابو العبد !
اسماء الدكاكين في البلد ولا حدا بعرف او نادر ما بعرف اسمها المكتوب على اللافتة . ممكن صاحب الدكان يكتب على اللافتة اسم : دكان الامل. لكن الناس بظلوا يسمّوه دكان ابو العبد على اسم صاحبه .

آب اللهّاب
شهر آب من احمى ايام السنة في بلادنا لذلك نسميه اب اللهاب من كلمة لهب بمعنى حار جدا .

حكم القوي على الضعيف
قانون الطبيعة. ممكن نشوفه كل يوم وفي كل ظرف. قانون تعامل القوي مع الضعيف اللي احيانا كثيرة يكون جائر وغير منصف وغير عادل.

الدهن بالعتاقي /  ما يجيبها الا العتاقي
العتاقي هن الكبار في العمر . في كثير شغلات في الحياة بدها كبار وما بنفع معها غير كبير راكز وعقله رصين. يقال لما يكون في حاجة لكبير او لما كبير بعمل شغلة معينة ملفتة او مبهرة. ويقال ايضا: اللي مالو كبير مالو تدبير

اللي بنزل من السما بتتلقاه الارض
احيانا من كثر المشاكل بتقول طيب خلي قسم من الاشياء للحظ. مش راح احل مشاكل العالم. اللي بسقط من السما راح تتلقاه الارض. وفي سياق ثاني بكون الحديث موجه لشخص. مثلا في حالة نزاع احدهم بحكي للثاني: ياخي اعمل اللي بدك اياه بطّل عندي قوة للموضوع واللي بسقط من السما بتتلقاه الارض....بمعنى نوع من التسليم مع الامر الواقع ...او بتكون مترقب حدوث شيء لكن ما باليد حيلة بتقول: اللي يصير يصير ... واللي بنزل من السما بتتلقاه الارض .. او بتلقوه اهل الارض ..

القلوب عند بعضها
يقال لما يكون في تفاهم عفوي بين شخصين بدون تخطيط او تنسيق مسبق. مثال: اثنين عملوا نفس الشغلة بدون تنسيق مسبق. او : شخصين التقوا في نفس المحل او اتصلوا لبعض في ان واحد ...الخ

شعبان ورمضان
يقال: بخلط شعبان برمضان او شو جاب شعبان لرمضان..؟ لما يخلط شغلتين ما الهن علاقة بببعض ..

العرب عربين
مثال: حصلت فتنة وانقسموا الناس قسمين او حزبين يقال للشخص اللي سبب الفتنة: ليش بتعمل العرب عربين.... او عاملين العرب عربين.. وهكذا

بيت خالتو /  بيت خالتك
يعني السجن. في بيت خالته يعني بالسجن.

لا خلّى ولا بقّى /  لا خلّت ولا بقّت
مثال: طوشة بين نسوان ثنتين تخللها مسبيات وصياح الخ يقال عن احداهن مثلا : لا خلت ولا بقت يعني ما تركت حكي الا قالته

نومة اهل دابو ...
القصة الشعبية بتحكي عن مجموعة ناموا زغار وقاموا ختيارية يقال: نومة اهل دابو اللي ناموا شباب وقاموا يتحابوا ! دارجة على لسان الختياريات لما مثلا واحد بدو ينام في غير ميعاد النوم ... الخ

انو وراك بعصاه ؟!
يقال لما بكون واحد مستعجل بدون سبب كأنه واحد لاحقه بعصاه ..

مابنزلّيش من زور !
يقال عن شخص مش عاجبك ..

بِش يمّا ارحميني
يقال لما شخص بوقع مع ناس ما عندهم لحى ممشطة او ما عندهم رحمة او رأفة لانهم ما بعرفوه اصلا ... او تحذير من وضع مش راح تلاقي فيه رأفة او تعاطف يقال: هين ما في يمّا ارحميني يعني هذي مش امك اللي تشفق عليك وتحنّ عليك ..

لا أحمّ ولا دستور
واحد داخل بيت بدون استئذان.. بقولوا فايت بدون احم او دستور . كلمة دستور تقال لاشعار المضيف انك داخل عنده او لاشعار اهل بيتك انك داخل مع ضيف. وتقال احيانا مع تطويلة: دستوووور !

الانسان خلق من طمع
يقال لما شخص يتصرف بطمع ..

مطراق رمان
رفوع شجرة الرمان مناسبة لصناعة المطاريق! ومفردها مطراق اللي هو كرباج او عصاه للضرب او الوخز . ومطراق الرمان بِزلع زلع يعني بوجع ! لما الام بتغضب على ولد بتحكي لواحد من اولادها: روح جيب لي مطراق رمان !

خِلط بِلط
تقال عن مجموعة مختلط فيها الحابل بالنابل ناس من الجنسين ذكور واناث. مثال: عرس كان خلط بلط

لا هو ولا طليلاتُه
يشبه المثل: اجا تا يطلّ سبق الكل. مثال ولد اسمه سعيد مشاكس جدا . اجا ولد اسمه حمودي مشاكس اكثر منو . يقال عن حمودي: هذا لا سعيد ولا طليلاته بمعنى انه سبق سعيد بالمشاكسة. طليلاته تصغير طلاته يعني حضوره .

الناس بتقدم لقدام واحنا منرجع لورا
طبعا شارح حاله

العين بصيرة واليد قصيرة
شخص عنده كثير احلام وتخطيطات لكن ايده مش طايله (قصيرة). يقال لما في كثير اشياء بدك تعملها لكن تنفيذها صعب. العين بتشوف بعيد لكن الايد (اليد) قصيرة عن التنفيذ ..

تخافش مش راح يطير
مثال: جماعة طالعين مشوار وشخص بأخّرهم لانه قاعد على التلفزيون بحكوله: تخفش التلفزيون مش راح يطير . راح يستناك لحد ما ترجع !

مش مصلّي ع النبي
شخص معاند او مشكلجي بعيد وبكرر وبعاند لحد ما يقولولو : شكلك مش مصلي ع النبي يعني شكله مش رايح يجيبها البرّ يعني بدو يعمل مشكلة. مثال اخر : الدنيا ناوية على مطر قوي يقال: شكلها الدنيا مش مصلية على النبي...وهكذا
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 4:02 pm

تقتّلوا قرايبه وهو يتشمر
بالاصل طوشة دايرة وواحد قاعد بتشمّر عشان يشارك بالطوشة! انتهت الطوشة وصار اصابات وحضرته بعده بتشكّل يعني بشمّر باديه ! تستعمل المقولة في سياقات مشابهة.

قالّو بتعرف تبدا قالو اه. قالو بتعرف تنهي قالو لا. قالو لعاد ما تبدا
المقصود لما تبدا في امر معين لازم تعرف كيف تنتهيه او ما بتبدا فيه ابدا

عال العال
يعني الوضع ممتاز . فوق فوق ! تقال عادة جواب لسؤال: كيف الوضع؟ جواب: عال العال. وهكذا

خالص كازو
يعني مهستر ! مجنون ! خالص من العقل... وهكذا

يلا السلامة وهداة البال
يعني وينك ووين الموضوع اللي بتحكي عنه.. مثال: شخص بحكي انه لما يكبر ابنه بدو يشتريله سيارة. بحكوله: يلا السلامة وهداة البال.. لما يكبر ابنك والله بهوّنها .. لوقته وفرج ... وهكذا

شِد وارخي
طريقة الترهيب والترغيب. العصا والجزرة. مرة بتشدّ مع ابنك ومرة بترخيله الحبل يعني بتكون مرن معاه وبتعطيه شوية حرية. بالاصل بهيمة مربوطة بحبل. مرة بتشدّ الحبل وبتقصرلها ومرة بترخي الحبل وبتطوللها ...

سُنة الحياة
جواب لأسئلة كثيرة. مثال: الناس بتجوزا عشان هيك سُنة الحياة. وبخلفوا اولاد عشان سنة الحياة وهكذا. بتسأل واحد مالك ومال الجيزة يا زلمي؟ بحكيلك: ما انت عارف سنة الحياة... يعني هذا الدارج والمقبول

زمن الشقلبة
يعني الاشياء ماشية خِلف خلاف. بالعكس. تستعمل كثيرا لوصف حالة لا تستقيم مع المنطق والعدل والواقع وما هو مقبول ومتوقع.

ما خلّالهاش وجه / ما خلاّلناش وجه
ويقال: ما خلاّلنا جهة نتطلّع عليها. وما خلاّلنا جنب نتريّح عليه او نتركّى عليه . يعني أوصل نفسه او غيره لوضع صعب اصلاحه. وضع حرج صعب ازاءه تقديم طلبات او شروط مسبقة للطرف الاخر. وعمليا بكون وضع اللي لا يمكن ازاءه الا الرضوخ للامر الواقع .

عين ما تشوف قلب ما يحزن / لا عين تشوف ولا قلب يحزن
او بعبارة اخرى بعيد عن العين بعيد عن القلب. كل ما لا تراه العين لا يحزن القلب.

شفنا من الدْباب عجاب / من الحامض للحلو
يعني من كل الاصناف والاشكال. مثال: بمرقوا من الشارع كل انواع الناس بتشوف من الدباب عجاب. ومن الحامض للحلو .

ما شاطر اجحا الا ع مرت ابوه
يقال عن واحد بتشاطر على مرتو وعلى اهل بيته والمقربين. 

مش بيننا /  مش بيناتنا
يعني ما في بيننا تكليف. مثال: واحد بشكر صاحبه على فعل معين. بجاوبه: مش بيننا. يعني ولا يهمك. لا شكر على واجب. ما في بيننا شكر وتكليف.

اللي خِبركم فيهم /  اللي بالي بالك /  ما غيرهم
يعني اللي انتو عارفينهم

كزدرة
مشي خفيف وممتع. تجوال في الشارع او الحارة او الخلاء .. وللتطليف يقال: كزدورة . والفعل: يلا نكزدر . يلا نروح نكزدر . بقينا نكزدر ... وهلم جرا

شكحنا بطيخة وطلعت حمرا ومليحة ....
من أغاني النسوة في الاعراس. كانت احيانا على شكل مهاهاه :
آآآآوي شكحنا بطيخة وطلعت حمرا ومليحة ... آآآوي واللي ما يحب فلان ما ينوبو الا الفضيحة ..... وهلم جرا

بهدلة أدبية
مصطلح منتشر في القرى والمقصود فيه بهدلة بدون تجريح ومسبيات واهانات لكن في نفس الوقت بهدلة موجعة توصل رسالة واضحة.

يتبعّر
يلايم بقايا المحاصيل بعد ما تخرّب يعني بعد ما يتركها صاحبها. ممكن شجر وممكن اي محاصيل اخرى. هناك من المزارعين من يترك العُشر عمدا للمحتاجين. في العادة يكون على اطراف الحقل حتى تسهل مهمة المتبعرّين وما يشعروا بالحرج. وفي الغالب بكون المحصول على الاجناب والاطراف ضعيف في حال الاصل.

خلّي لغيرك / اللي طاحت راحت!
مصطلح دارج ايام ما كان على اطراف القرى مساحات فاضية بور وسهول ووعر واحراش. طبعا هاي مش اراضي اللي ما في الها اصحاب. انما متفق ومتعارف عليه بين اهل القرى آنذاك انه هاي اراضي للكل. مثل مراعي ووعر واشجار بريّة كل واحد بقدر يقطف لكن دايما بحكوله: خلّي لغيرك. يعني اعمل حساب غيرك. خلي كل البيوت عمار . لكن دايما في ناس اللي بالنسبة الهم اللي طاحت راحت. بمعنى انه ما بخلّي لغيره. طاحت يعني استوت او نضجت. والشجرة اللي نضجت راحت! لانه الكل بقطف. ومن ضمنه طبعا الطير والحيوان.

ربنا يوخذ وداعته
يعني ربنا يوخذ شخص لعنده بمعنى انه الانسان يموت. الانسان وديعة في هذه الدنيا والله يأخذ وديعته (وداعتو) متى شاء. يقال عند الزعل: الله يوخذه! يعني يموته.

الهُبل والسذّج عمرهم ما بموتوا ... بس بتغيروا
من العبراني. اهبل بروح واهبل بيجي بدالو . وساذج بروح وساذج بيجي محلو .....ودواليك

كِسِب
الكسب والاسترزاق من اهم الاشياء ان لم يكن أهمها في الحياة والمجتمعات التي يغلب عليها طابع صراع البقاء. ونَصفها في القرى بالسلبية حين نلفظها بالكسر "كِسِب" بمعنى الكسب المنفلت والاناني والمجاني على حساب الاخرين. فترانا نقول لاحدهم: خلي لغيرك هي المسألة كِسِب ؟!!

أقل ناس أقل وجع راس
قديش اقل ناس بكون اقل وجع راس. وطبعا قديش اكثر ناس بكون اكثر وجع راس.

يا تعبنا ويا شقانا
احيانا نتعب ونشقى ثم يحصل شيء يهدم كل ما فعلنا فنقول تحسرا : يا تعبنا ويا شقانا .. يعني خسارة على تعبنا وشقانا

اللي ملوش أهل الحكومة أهله
عبارة دارجة في القرى حين يكون الوضع سائب ومنفلت لا قوانين ولا رادع. والناس بدون أعراف اجتماعية وقوانين لاجمة ينفلتوا وتكثر اعتداءاتهم على بعض خصوصا على قليلي الحيلة والضعفاء المقطوعين من شجرة الذين لا عائلة لهم او اهل او حمولة تحميهم فيلجأوا الى السلطة طلبا للحماية. من هنا انتشرت المقولة: اللي مالو اهل الحكومة اهله .

خذوهم بالصوت لا يغلبوكم ....
ثمة ناس يعلو صوتهم وقت النقاش او مجرد حديث وطبعا وقت النزاعات بدافع غريزي كأن يزأر ويصرخ ليردع. يعتقد هؤلاء انه : خذوهم بالصوت حتى ما يغلبوكم ... ومن ناحية ثانية عندما يحصل فعل من هذا القبيل كأن يصرخ احدهم حين يكلمك او يناقشك تبادره بالقول: انت من جماعة خذوهم بالصوت..... تذكيرا له بان حجته ضعيفة وهو يغطي عليها بالصراخ لتكون الغلبة للزعيق ..

عايشين من قلة الموت
تقال جوابا او وصفا لحالة ضجر او حياة بائسة ومملة وميئوس منها. يسألك احدهم كيف حالك او كيف احوالك فتجيب: والله عايشين من قلة الموت ..

واوي بلع منجل !
الواوي هو الحيوان المعروف من فصيلة الثعلب والحصيني. والمثل هو وصف لحالة سكوت وذهول وشلل مثل حالة الواوي اللي بلع منجل. والمنجل أداة الحصاد. أحيانا يتفاجأ شخص بكلام مباغت يلجمه ويتركه صامت ومذهول فيقال: واوي بلع منجل.

أصحاب العقول في راحة
وفي نفس السياق يقال: العقل زينة. وصفا لكلام او فعل أحمق.

دالِع
يقال عن الطبيخ اللي ناقصه ملح دالع. ويقال عن الانسان اللي ناقصه ملاحة وخفة دم : دِلِع او سِقِع او بايخ او مايط ..الخ

كان في بير ونشلتو
شخص كان في مأزق ووضعه شبيه بحالة الغريق او كأنه سقط في بير وفجأة أجاه الفرج كأنه واحد نشله من بير .

حبّك برص وعشرة خُرس !
تقال مثلا لشاب بحكي لامه وابوه انه بحب فتاة مش على مراقهم. يعني مش على مزاجهم. فيكون جوابهم : حبَّك بُرص ..!

فوق حقّو دُقّو
انسان تعرض لظلم ثم وقع عليه زيادة من الظلم. مثال: انسان صاحب حق خسر في المحكمة ودفع تكاليف المحكمة يقال فوق حقه دقه. بمعنى فوق الظلم اللي وقع عليه بخسارة القضية كمان تم تغريمه بدفع التكاليف... وهلم جرا

خلّيها بيعة عرب ..
بيعة العرب بتكون مطابلة يعني حسب قوانين قروية. تخمين وتقدير ومسايرة وبالناقص والزايد. لا تخضع لقوانين منظمة مثل عقد بيع وصفقات منظمة ومحددة البنود وما الى ذلك. بحثا عن السهولة والسرعة وعدم تعقيد الامور . تقال عن كل صفقة او اتفاق يفتقر الى بنود واضحة ومفصلة.

مِلحَة وذابت
يقال عن شيء او شخص اختفى فجأة ولا احد يعرف مكانه . مثل كمشة الملح اللي ذابت واختفى أثرها .

لا بِقطَع ولا بوصِل
شخص عقله خِشِن. تيس لا يمكن التحاور او التفاهم معه لانه لا بوخذ ولا بعطي بالحديث ..

الله لا بِقطَع ولا بضيّع
يعني دائما الامل بالله الله لا يقطع ولا يضيع الحقوق. دائما يساعدك من حيث لا تدري

ورجيني عرض اكتافك
يعني انصرف من هون! اذهب الى حال سبيلك. يقال تلطفا لكن بنبرة واضحة : ورجيني عرض اكتافك! او خلينا نشوف عرض اكتافك ..! ويقال في نفس السياق ونفس اسلوب التلطف: تفضّل من غير مطرود !

نغنغة
معناها ترف ونعيم. انسان منَغنَغ. والفعل: تنغنغنا.. مثلا كنا في عرس او زيارة او مناسبة او عزيمة وتنغنغنا بالاكل ! وهكذا ...

ترك الجواب هو جواب
مثال دارج: وقت الخطوبة وتحديدا زيارات نقد العروس والعريس. اذا كان جواب احد الاطراف بالنفي يعني رفض يترك الجواب يعني ما بردّ جواب للطرف الاخر وهذا معناه الرفض. في القرى يفعلوا ذلك تجنبا للاحراج والمس بالمشاعر . وعقلية ترك الجواب دارجة في نواحي كثيرة في حياتنا.

خاف من المية الهادية
المية الجارية لا تخيف لانها تكشف اسرارها وعمقها بجريانها وصوتها. لكن المية الهادية لا تعرف عمقها وماذا تخفي في داخلها. من هنا يقال عن الاشخاص: ياما تحت السواهي دواهي. وخاف من الساكت. وخاف من المية الهادية.... الخ

العب غيرها
شخص بحاول يمرّر قصة انها حقيقة او بحاول يمشّي قصة عشان يطلع من مأزق او لأي مآرب اخرى يقال له بعد اكتشاف امره : العب غيرها ! يعني لعبتك مكشوفة العب لعبة غيرها

العبرة بالنهاية .. او كما يقال الاعمال بخواتيمها

الصبر بدو صبر
المقصود نبات الصبّار لقاطه بدو صبر وتقشيره بدو صبر عشان الاشواك على الكوز وعلى الصبرة الام

الحال محوّل
يعني الوضع بدو ردع.. الحال صعب

هوّ الله برعى بغنم ...؟!
يقال لما يظهر الحق وينفضح الباطل ويعود الامر الى نصابه والحق لأصحابه. مثال: انسان ظالم لقي عقابه وتعرض لمحنة او ما شابه يقال: والا هو الله برعى بغنم؟!

مصير الحيّ يتلاقى
الاحياء دايما بتلاقوا مهما طال الزمن ومهما بعدت المسافات

اللي خلّفه ابوك الك ولأخوك
تشجيع على المساواه بين الاولاد وانه وِرثة الاب للجميع سواء في حياته او بعد مماته

بِعرف وبِحرف
شخص عارف الحقيقة لكن بحرف عن الحقيقة بالعمادا يعني عن سابق قصد واصرار لهدف او غاية في نفسه

الصباح رباح
تقال عادة في أوقات المساء لما تكون شغلة ممكن تأجيلها للصبح

مش شايف الفظا
الفظا هو النور. الفضاء. ساعات النهار . واحد مش شايف الفظا يعني متعصبن او معصّب جدا او في حالة نفسية صعبة لدرجة انه مش شايف حواليه

أضرب التلّ تا يختلّ
يعني اعمل اللي بدك اياه. أعلى ما في خيلك اركبه مش راح يجيب نتيجة. زي اللي بضرب في تلّ او جبل

فش حدا على راسه ريشة
يعني ما في حدا احسن من حدا. عادة الامير بحط على راسه ريشة. يعني ما في كبير وامير . كلنا زي بعض

يا بتشيط يا بتعيط / ومثلها: يا بتصيب يا بتخيب
يعني جرّب حظّك اما بتزبط معاك او ما بتزبط . تشجيع على التجربة والعمل

من ذيله واعمل له شباك
يعني منه فيه. اعمل شبكة لحيوان او طير من ذيله .

ماسك الدين من ذيله / ماسك الدين من ذنبته
يعني مركز على القشور / على ذيل الدين يعني طرفه مش على الجوهر . تقال عادة عن انسان جاهل بدو يهدي الناس ويوعظهم او انه يمارس الدين على كيفه في الوقت اللي بركز على الامور الهامشية او الطقوس وينسى المقاصد الاساسية للدين. وهيط طبعا بجيب وجع راس للناس.

كلك على بعضك حلو
مأخوذة من أغنية كلك على بعضك حلو . والأغنية طبعا مأخوذة من التراث الشعبي. تقال لانسان كامل مكمل كل شي في حلو مظهره وعقله وأخلاقه ..الخ

خَيِّط بغير هالمسلة
يعني العب غيرها. شوف لك لعبة ثانية. المسلة تستعمل للخياطة. يعني شوفلك حبكة ثانية او خرّفية ثانية او لعبة ثانية تضحك فيها على الناس

اللي بدو يبيع سلعة بغلّي سعرها
قانون في التجارة. أحيانا سلعة يصيبها الكساد وما في حدا سائل عنها لانها رخيصة. وفي ذهنية الناس الرخيص ما اله قيمة. لهيك يلجأ التاجر احيانا الى رفع سعر السلعة لخلق انطباع انها ذات قيمة.

فش عليه صيب ودحِل
يعني غرض او موضوع اللي ما في عليه نقاش. يبدو انه مصدره من عالم التجارة. صيب هو اللمس. ودحل هو دحرجة الشيء. لكن لا ادري ما هو السياق الاصلي. المثل قديم وصلنا معناه لكن ضاع سياقه الاصلي.

قالّو شو جبرك ع المُرّ قالّو اللي أمرّ منه
يقال عند الاختيار بين أمرّين اللي هم أمرين صعبين. يعني حالتين وحده أصعب من الثانية. أحيانا يختار الانسان مجبرا الحالة الاخف ضرر وعندما يُسأل لماذا اختار المرّ يعني كيف أقدم على هذا الفعل الصعب فيجيب: لانه الخيار الثاني أشد مرارة وصعوبة.

ويا طابوني لا تِنهَدّ
الطابون معروف. أحيانا تبني طابون وبنهدّ وبدك تبنيه من جديد . لكن استعمال العبارة في الحياة اليومية له سياق اخر : عندما يضربون شخص ضربا مبرحا. يقال مثلا: مسكوا اللص او الحرامي وبلّشوا فيه يا طابوني لا تنهدّ. يعني بلّشوا بيه ضرب بدون رحمة .

فُرجت
مأخوذة من بيت شعر يقول عجزه على ما أذكر : ولما استحكمت حلقاتها فُرجت. يعني بعد ما تعقّدت الامور وبدا انه من المحال ان يكون لها حل، وقتها فجأة بدت بوادر الحل. ويقال في نفس السياق انه أشد ساعات الليل ظلمة هو ما يسبق طلوع الفجر. وايضا: ما بعد الضيق الا الفرج. كذلك: ان مع العسر يسرا. وكلها تعطي نفس المعنى.

بِحِلفوا بحياته
يعني كلهم بمجّدوه ومبسوطين منه وراضيين عنه وبحبوه. لدرجة انهم بحلفوا بحياته يعني بقولوا وحياة فلان كنوع من القسم ..

نص الطريق ولا كلها
ويقال اول الطريق ولا كلها. يعني اذا شفت حالك ماشي في الغلط او في طريق لن يكتب له النجاح ولن يوصلك الى الخير وقتها أفضل انك توقف وتنهي في اول الطريق وما تندم انك صرت بادي او صرت في وسط الطريق، لانه التمادي في الغلط نتائجه أصعب.

فِرجِة
بناية جميلة او عمل متقن او مشهد جميل اللي تحوّل الى فرجة يعني الناس بيجوا يتفرّجوا عليه. فلان صار فرجة للناس يعني بتفرجوا على اعماله بالمعنى السلبي وبسخروا منه. وفرجة كمان اسم علم مؤنث.

اللي بحكيش قدّامك بحكي وراك
في ناس ما بحكوا قدامك او في وجهك من باب المجاملة او الخجل او المسايرة او الخوف، لكن احتمال كبير انهم يحكوا وراك . لذلك حاذر وخذ الامر دائما بالحسبان. والأفضل انك تعطي مجال للناس يحكوا في وجهك.

قرّاطين الزرع
في ناس متوحشين لدرجة انهم بقرطوا زرع يعني بوكلوا حشيش! يقال احيانا في دعوات الختياريات: الله يبليك في ناس او يسخّرلك ناس من قرّاطين الزرع!

من سقيعها لركيعها
وتكتب صقيع وهو البرد. اما الركيع او الرقيع فلا اعرف معناه. لكن سياق المثل معروف. المقصود انسان يعمل من الصباح الباكر وقت ما بكون الجو فيه بروده وحتى المساء.

الوِفِق بِعين ع الرّزق /  الوفق بجيب الرِّزق
المقصود الوفق بين الأخوة وأبناء العائلة الواحدة او المقربين. كلما توافقوا ازداد رزقهم وتحسنت سبل عيشهم .
avatar
الشاعر عمر القاضي

المساهمات : 695
تاريخ التسجيل : 17/09/2010

رد: ارشيف الامثال الشعبية الفلسطينية

مُساهمة من طرف الشاعر عمر القاضي في السبت فبراير 21, 2015 4:09 pm

بالمشمش
ويقال تا ينوّر الملح وتعطي نفس المعنى انه الامر مستحيل الحدوث فالملح لا ينوّر . اما المشمش فيقال ايضا جمعة مشمشية في اشارة الى قِصر موسم المشمش لان الثمر ينضج سريعا بفعل حرارة حزيران وتموز وينتهي الموسم بسرعة فنكاد لا نشعر به. هو شيء سريع ومؤقت اذن. ولما شخص يطلق وعدا مثل: بالمشمش. فالاحتمال ان يتحقق الوعد ضئيل لانه موسم المشمش ما ان يبدأ حتى ينتهي والمجال ضيق لتحقيق وعود. وذهبت عندنا مثلا عندما يقال بالمشمش يعني لن يحدث ابدا.
ومن نهفات المشمش في فلسطين عبارة: هذا المشمش مش من مشمشنا عندما يتدرب الاطفال وحتى الكبار على النطق ويمارسونها من باب المتعة ..

طباخ السمّ بذوقه ..
 يعني اللي بشتغل بالطبيخ لا بد يذوقه واللي بشتغل بالدخان لا بد يدخّن وهكذا.. حدثني والدي عن ايام زمان قال سأل الضابط أحدهم ليه بتلفّ دخان بتعرفش انه ممنوع. جاوبه : لانه طباخ السم بذوقه ...

الله يصبرك يا صبري ..
عبارة دارجة عن الصبر . لما انسان ينفذ صبره بقول الله يجيبك يا طولة الروح او طولة البال او الله يصبّرك يا صبري

اللي مصروفه من امه شو بهمّه
طبعا الامثال اللي شارحة حالها ما في حاجة نشرحها

حتى انت يا بروتوس؟؟
 قالها الامبراطور الروماني يوليوس قيصر قبل الفي عام. وبقيت في الوعي الجمعي. مثال انتشرت مقولة في بلدنا قبل سنوات عشية الانتخابات المحلية ترشح احدهم للرئاسة وعقّب شخص اخر على الموضوع معروف بخفة روحه قال: حتى انت يا ........ تريد ان تصبح رئيساً.. وذهبت حديث الناس..

قزاز يا ابو النعيم !!
مسجلة باسم المرحوم ابو النعيم عادل اسعد مرزوق من عرعره. راجت مقولة قزاز يا ابو النعيم خلال عمله في القصارة كان عندما ينهي عملا في القصارة يقول: قزاز يا ابو النعيم في اشارة الى اللوحة الابداعية التي رسمها على الحائط.... وذهبت مثلا

يا خيل شدّي واركبي
عندما يجد الجد وقت النوازل يشدون على الخيل ويركبون للذود عن البلد او وقت المعارك والفروسية والسباقات والمبارزات والمناسبات الخ. لذلك لما بكون مشاحنات او نزاع بين طرفين يصفون العلاقة بينهم بهذه العبارة: العلاقة بينهم يا خيل شدي واركبي..

المؤقت هو الدائم
وفي رواية اخرى: المؤقت هو الابدي.. حاذر عندما يخاطبك احدهم بالقول انه راح يعمل هيك وهيك بشكل مؤقت عشان الوضع كذا وكذا... حاذر لانه المؤقت سيصبح أبدي ...

عقلُه غزّ
يعني عقله متحجر كأنه وتد مغزوز غزّ في الارض او بالصخر صعب تحريكه.. ويقال ان عبارة غز لها أصول قديمة تنسب الى شعوب الغز الذين تواجدوا في بلادنا قديما لكن لا اجزم في هذا الموضوع. تماما كما يقال فلان عقله كردي!! في اشارة انه الاكراد روسهم ناشفة !!

ظابب خيري وشرّي
يعني لحالي لبالي لا باجي بحدا ولا حدا بيجي بيي.. صباح الخير يا جاري انت بحالك وانا بحالي.. لا بساعد الناس ولا بطلب مساعدة من حدا... بس خلوني بحالي

غمّض عين وفتّح عين
يعني بسرعة فائقة. برمش العين. واحد بسألك قديش بدك وقت لحد ما تروح وتيجي بتجاوبه: يعني غمض عين وفتح عين..

ظايل منه توالي
توالي جمع تالي يعني الاخير او اخر ما تبقى. يقال مثلا التالي للغالي. يعني مسك الختام او الحصة الغالية محفوظة للشخص الاخير.

رِنّ الابرة / او دِبّ الابرة بتسمع صوتها
دلالة على الهدوء التام لدرجة اذا بتوقع ابرة على الارض بتسمع صوتها واضح من الهدوء. ويقال في دارنا من باب الفكاهة: بتسمع دبيب النملة من شدة الهدوء ..

جَلوة
الجَلوة كلمة لا تستخدم اليوم الا نادرا الغالبية لا تخبر معناها لتغير الظروف. كان في الماضي يتم اجلاء عائلة القاتل الى قرية اخرى. العادة ما زالت موجودة لكن الاصطلاحات المقرونة بمثل هذه الحوادث نسيها الناس الا قليلا. اجلاء عائلة القاتل يسمى جلوة. واسم عائلة المجالي جاء من هنا. ايضا بالعبري اسمها جلوة: גלות. بمعنى ترحال وتهجير وتشتت.

وزة وسخلة وشتلة ...
عبارة طريفة كانت والدتي ونساء الحارة ترددها كثيرا في وصف عمل لا طائل منه لا يسمن ولا يغني من جوع.  كانت تقول: دايرلي على وزة وسخلة وشتلة !!!

أجت منهم ماجتش منا
مثال عزموك على مناسبة وما الك رغبة تروح لكن مجبور وما الك مفر . وفجأة حصل شيء والمناسبة تبطلت. بتقول يلا اجت منهم .......

لا يْموت الذيب ولا يِفنى الغنم
مأخوذة طبعا من رعي الاغنام والذيب اللي كان يهاجم الغنم في غفلة من الراعي. الذيب ممكن يفترس نعجة او اكثر لكن القطيع لن يفنى من الافتراس. كمان الذيب ذيب بروح وذيب بيجي ويبقى الوضع كما هو عليه في مشهد ازلي. يقال المثل في وصف حالة يبقى فيها الوضع كما عليه يبقى الذيب ويبقى الغنم

مارق من تحت ايدي
يقال عن شيء خابرُه مليح ومتمكن منه وضليع فيه ومارر عليه بمعنى انه مر بالتجربة مرات ومرات. يقال: مارق من تحت ايدي

واحد بخرّب على عيلة كاملة
واحد سويد وجه ممكن يشوّه صورة العيلة كلها. كما يقال: الولد العاطل بجيب لاهله المسبة..

ورانا ورانا .....
مثلا همّ او نحس لاحقك وين ما تروح بتقول: ورانا ورانا... او شخص وين ما تروح بتلاقيه بتحكيله: شو هالمحبة الزايدة وين ما بروح بلقاك بوجهي!! او : انت ورانا ورانا.... وهكذا

حامل السلّم بالعرض
ماشي بعكس السير او عكس التيار . لانه الطبيعي انه تحمل السلم بالطول مش بالعرض. لانه حملان السلم بالعرض بسكّر الطريق. يقال عن شخص ميخذ الموضوع عباطة وعناد وكبرة راس ودفاشة ..

حنّيركم ...
حِنّيرك او حِنّيركم تقال للمباهاة كأن يحمل طفل دمية جديدة ويتباهى بها امام أترابه بالقول: حنيــــركم ....

اول الطريق ولا آخرها
مثال في حال خطب شاب فتاة. والخطوبة للتعارف في اطار العائلة. الخطبة تضفي صفة رسمية مقبولة حتى يتسنى للعروسين التعارف فاما ان يكملا واما يفترقا قائلين: اول الطريق ولا اخرها ... لانه التمادي في الخطأ او في علاقة لن يُكتب لها النجاح هو امر غير محمود ..

عمُر زين ما كمل
اشتريت علب دخان عربي طلع التبغ مش نافع والزهرة تاعت السيجارة بتظلّها تكتّ لحالها. اشتريت نوع ثاني طلع التبغ عتيق. النوع الثالث تبغ مليح بس حامي. نوع رابع مليح بس بنخطف بسرعة من الدكانة. النوع الخامس ممتاز بس العلبة حشر بتغلّب تا تفتح وتسد. تذكرت مثل الختيارية : عُمُر زين ما كَمَل. وفي نفس السياق يقال: يا فرحة ما تمّت: لما بحصل اشي مليح بس اشي بفركش بالاخر ..

قالها شو هالطعجة يا نعجة قالتلو الظروف يا خروف ...
بحكوا المثل لما يشوفوا واحد جاعص عامل طعجة وهو قاعد ...!! بحكوله : شو هالطعجة يا نعجة ..!

احكي كلمة حق ولو على قطع راسك
تشجيع على قول الحق والصدق بكل الظروف والحالات حتى لو تعرضت حياتك للخطر . وفي الأدبيات العربية معروفة المقولة عن العالم الذي يقول قولة حق امام سلطان جائر . لانه اذا ما بتقول الحق ممكن تنجو بس بتعرض غيرك للخطر .

ما احلاكي يا فايزة طول ما انت عايزة
يقال لشخص بتدروَن وبجامل وبتحذلق وبحكي بشكل لطيف وبلفّ حواليك لحتى يحصل على مصلحة ..

طلوع الحمام مش زي دخوله
احيانا سهل انه الشخص يحشر حاله في موضوع او يدخل نفسه في ورطة او يعمل شيء بحسن نية. لكن مرات صعب يطلع منه ..

أحنا بدنا عزا ونشبع فيه لطم
اهل القرى بحبوا العزا والمشاكل والمآسي عشان يشبعوا بكاء وعياط وعويل ولطم وتذمر ..

القول قول مشايخ والفعل فعل شياطين
هذا طبعا من الامثال اللي شارحة حالها. وما أكثرهم في ايامنا

لا جاي من الله ولا من عبد الله
يعني الظروف مش ماشية معاك

مسحوب من لسانه
شخص بعرف يحكي. لسانه ماضي. زي اللي مسحوب من رحم امه من لسانه ..!

يا ارض اشتدي ما حدا قدي ... ويا ارض اهتزي ما حدا قدي
واحد مغرور ومعجب بنفسه عنده أنفة وكبرياء وكأنه بقول للارض: اهتزّي يا ارض ما عليكي حدا غيري او مثلي ..

قالّو بتعرف تكسر قالو آه قالو بتعرف تجبر قالو لع قالو لا فيك ولا بتجبيرك من الاول تكسرش ..
والمثل شارح حاله طبعا. لا تكسر شيء ما بتعرف تصلحه. ومجازا: لا تدخل في مشكلة ما بتعرف تطلع منها.

طغاك اللي بلّغك
ويقال: ضلّلك اللي بلّغك.. احيانا بتكون نية الشخص حسنة ويقول الحقيقة والصدق لكن ما زالت أقواله غير صحيحة لانه اللي بلّغه يعني اللي أخبره بهذا الحكي او لقّنه اياه او حفّظه اياه بكون عمل هيك بنيّة غير سليمة وحشرله لدماغه كلام غير صحيح

كل مرة زلابية ؟!
زي اللي بوكل كل يوم زلابية وهي أكلة معتبرة. ويوم بقدموله عدس فبحتجّ الشخص فيقال له: هو كل يوم زلابية ؟؟ ومجازا : مش كل مرة راح تتكرر الظروف السعيدة. يوم هيك ويوم هيك ..

اللي بدك تهريه أسكت وخليه
اللي بدّك تجلطه وتهريه تجاهله خليه يحكي لحاله ما تردّ عليه. لانه لما بتناقشه بتعطيه مجال يحكي ويسبّ ويفضفض ..

דיבורים כמו חול ואין מה לאכול
أعجبتني هذي المقوله بالعبري ومعناها: حكي زي الرمل وما في أكل .. والسياق لما تسمع حكي ووعود بدون حساب لكن التنفيذ يفتح الله ... منسمع وعود وحكي زي رش المطر والنتيجية مجاعة !! لانه الحكي ما في عليه جمرك زي ما بقول المثل..

اذا بدك تقنع حدا باشي طبقو على حالك
المواعظ والحكم ما بتجيب نتيجة طالما حكيك في واد وفعلك في واد. لازم بالاول تطبق كلامك على نفسك وتعطي قدوة لغيرك وبعدين تطلب منه يطبق. دارجة كثير في زماننا تجارة الحكي والمواعظ وخطب الدين بدون رصيد ..

لما بتقوم الصبح وبتقول عليّ كثير شغلات أعملها اليوم، اعرف انو حياتك جميلة ..
لانه اللي بقتل الانسان الملل وقلة الشغل. كل ما بتكون مشاغلك اكثر بتكون حياتك أجمل وتجاربك أفضل.

العين بصيرة واليد قصيرة
العين بتشوف اكثر من قدرة اليد على التطبيق. الانسان بطبيعته يصبو الى تحقيق كثير امور بشوفها وبفكر فيها يوميا. لكن مش كل شي بتشوفه بتقدر تطبقه ..

ان غاب سيدي وان حضر
يعني سيان. نفس النتيجة. اذا اجا او ما اجا نفس الشي..مش راح يغير اشي بالموضوع

لولاني قد العزا واهله
درر من حكي الختياريات. تقول: لولاني قد العزا واهله حاميت ودافعت عنكم ووقفت بصلابة مثل الوقوف في العزا كان رحتوا في ستين داهية ... وهكذا

تعلم بيطري على حمير النور
النوَر او الغجر كانوا ييجوا كثير على بلدنا زمان وكانت الهم عادات ورقص تختلف عنا. يقال مثلا: مثل النوريّة اللي مضيّعة لبانها. المقصود مرا بتحكي كثير نسبة الى النورية اللي كانت تحكي بدون توقف فما بالك لما بتكون مضيعة لبانها وما في اشي يشغلها عن الحكي ..!؟
والنور كانوا يتجولوا مع حمير وكانوا محطحطين في عاره غربا. ويقال عن شخص يمارس مهنة بدون تخصص وكأنه تعلّم بيطري على حمير النَور ...

خليني ساكت احسن
مثال: لما امر معين يوصل للذروة وما عندك طاقة اكثر تتحمله وممكن جدا يتحول الامر لمسبيّات وشتائم. وقتها تستجمع ما تبقى لك من صبر وتقول: خليني ساكت احسن.... او في حال انك ما بدك تحكي سرّ وبتكون مسترسل في الكلام وفجأة بتتوقف قائلا: خليني ساكت احسن.. بمعنى بكفي لحد هون ما بدي احكي زيادة وما بدي اكشف اسرار .. وبحكوا من باب الطرفة عن المرأة انها بتحكي بتحكي بتحكي بتحكي بتحكي بتحكي بتحكي بتحكي..... وبالاخر بتقول: خليني ساكتة احسن!!

معاهم معاهم عليهم عليهم
في ناس تبعيين ما الهم موقف ثابت. كل يوم براي. يوم بتشوفهم مع هذا الطرف واليوم الثاني مع هذاك الطرف. حسب الجو وشو بسمعوا من الطرفين. يوم معاهم ويوم عليهم. بحكولهم احنا معاهم بقولوا معاهم بحكولهم عليهم بقولوا يلا عليهم ..

بندقت اللعبة
وتلفظ بندكت. ومعناها وقّفت اللعبة او انتهت قبل أوانها بسبب خطأ معين. كانت تقال زمان وقت لعب الطممية (الغميضة او الطميمة). لما مثلا بكون واحد طامم وبفتح عينيه قبل ما يخلّص العدّ .. وهكذا

هامط
معناها مستْوي او ناضج ع الاخر. تقال في الفاكهة. وصارت تستخدم مجازا يقال فلان هامط ! يعني بايخ كثير ! او دمه ثقيل جدا ! لدرجة الهماطة ! وفي رواية اخرى يقال بالقروي: بسكّي ثقلة دم . و  ثقلة دمو عجايب !

يا باحش جورة السوّ يا واقع فيها
لغة ختياريات معناها بالعربي من حفر حفرة وقع فيها

الكلام صفة المتكلم

لولا الو بالمعرب سخول ..
المِعرَب هو المكان اللي كانوا يعرّبوا فيه السخول يعني يحطوها بشكل جماعي. واللي الو سخل كان طبعا يتواجد بين الحين والاخر. لهيك كانوا يقولوا انه اللي الو سخل بالمعرب بطبيعة الحال بيجي يطل عليه او يتصرّف فيه. ولولا الو سخل ما اجا ... ومجازا يقال: لولا الو علاقة او مصلحة بالموضوع ما تدخل ...

كيف ما ترميه بيجي واقف
اخر مرة سمعتها من الفنان راغب علامه قال لمحمد عساف انت كيف ما نرميك بتيجي واقف! والسياق انه محمد عساف غنى كل انواع الاغاني في برنامج محبوب العرب (اراب آيدل) وأتقنها كلها. زي اللي بترميه من علو وبيجي واقف. والسياق طبعا مفهوم .

يا بلعب يا بخرب
مثال: سمعتها في فترة الانتخابات. في ناس قاطعوا الانتخابات من مبدأ انه يا بلعب يا بخرّب! يعني يا بشارك يا بعطّل مشاركة غيري. والمثل دارج من ايام الطفولة دايما كان يجيك واحد بنص اللعبة يقولك يا بلعب يا بخرّب اللعبة !

نطق الجوهرة ...
يعني أخيرا نطق الكلمة اللي بدو يقولها. مرات واحد بعملك اثارة وبحاول يشد اعصابك عشان يوخذ انتباه اكثر . بحكيلك انه عنده خبر طازة وبعملك مقدمة ساعة. ساعتها بتقوله يلا خلّصنا أنطق الجوهرة. او واحد عنده معلومة او شهادة على حدث معين والناس مستنية منه ينطق الجوهرة... الخ

وقت الجد جد ووقت المزح مزح

شو رايك اجوّزك كمان..؟!
شخص بطلب منك طلب وبتلبيلو اياه. بروح طالب طلب ثاني وثالث.. بالاخر بتحكبله: شو رايك اجوّزك كمان..؟ّ! ظايل بس اجوّزك ..!

في بياع وجهه بضحكش للرغيف السخن!

خبط العصا..
يعني مسافة قصيرة هي مسافة خبط العصا. مثال: مكان قريب. وفي رواية قروية أخرى يقال: مسافة سيجارة !

اعمل حاجتي بايدي ولا اقول للكلب يا سيدي

يا ويلك من يوم شتوة .. يا ويلك من ظلام ليلك

لا الي ولا لاحباب قلبي
تقال عن امر مش محرز او مش مستاهل. لا بكفيني ولا بكفي احباب قلبي..

اللي بدفعش براس المال بتهون عليه الخسارة

بدناش نوخذ زماننا وزمان غيرنا ... وتقال ايضا: هو احنا بدنا نوخذ زماننا وزمان غيرنا..؟!
بحكوها الكبار من باب افساح المجال للجيل الجديد.

والله وارخصت يا تفاح ..
التفاح زمان كان من الفاكهة المرموقة والمعتبرة يوضع للضيف في وسط المائدة ويدل على رفعة المقام ويسر الحال. يقال مجازا عن شخص نزلت مكانته وراح عزّه ورخص ثمنه وراحت ايامه بعد ما تغيّر الحال وجار عليه الزمن وتطاول عليه صغار القوم . وفي اضافة اخرى يقال: زمن الاول حوّل ..

يا رب فوّتني في ذيقي تا اعرف عدوي من صديقي
طبعا الصديق يُعرف وقت الضيق. من هون المقولة او الدعاء المجازي يا رب فوّتني في ذيقة بمعنى أزمة لحتى اعرف الصاحب من العدو ..

نيّال اللي ببات مع همّ عتيق
الهموم تأتي تباعا ويكاد المرء لا يعرف لحظة راحة. لدرجة انه يقال نيّالو اللي بنام مع همّ عتيق. يعني المهم ما يكون هموم جديدة

بقصُمش بيه
وفي رواية أخرى: بِسخاش فيه. ويقال: بِسفطوش. المقصود انسان قريب بتزعل وبتغضب منه وبتنرفز عليه لكن ما بتقصُم بيه يعني ما بتقدر تؤذيه وما بتقدر تتخلى عنه وقت الضيق.

كزّاه على الدكانة
كزّى فعل ماضي معناه أرسل او بعث. مثلا كزّى واحد يجيب غرض. ويقال ايضا: ودّاه على الدكان بمعنى أرسله.

شو ما قالو شالو
ويقال ايضا: طلبك لسانك وتعطي نفس المعنى. مثلا خلال مساومة بين بائع وشاري او تاجر وزبون. من الاقوال الدارجة عند التجار : طلبك لسانك يعني شو ما قلت بمشي والسعر اللي بتحكيه ماشي. قول وشيل. يعني انت الزبون حدد السعر وشيل البضاعة..

حي على الصلاة حي على الفلاح
مأخوذة من الآذان لكن تستخدم كمقولة في اكثر من سياق. مثال: عمل تقوم به يوميا تقول: هذا البرنامج يومي مثل فرض الصلاة او مثل حي على الصلاة حي على الفلاح. كون الصلاة والآذان شيء يومي

ترك الجواب هو جواب
واحد راح ينقُد عروس. ينقد يعني يقوم بزيارة اولى مع أهله عشان ينقدوا العروس بمعنى يشوفوها اول مرة ويقيّموها وعلى ضوء ذلك يقرروا اذا الموضوع يستمر او لا. في طريقتين لردّ الجواب. الاولى انهم يحكوا مع الواسطة وعن طريقه يبعثوا رد لاهل العروس. والطريقة الثانية انهم ما يردوا جواب وفي هذي الحالة بكون الردّ سلبي. طبعا عدم رد الجواب بكون تجنبا للحرج اللي برافق رد الجواب السلبي. وعدم ردّ الجواب في هاي الحالة هو جواب. جواب سلبي طبعا يعني رفض.

طبول عند اطرش
الاطرش ما بسمع صوت الطبل. ولما بدك توصف حالة صاخبة وما حدا سامع حدا وما حدا داري بحدا بتقول : طبول عند اطرش. صوت عالي وجلبة صاخبة لكن ما حدا سامع والرسالة ما وصلت.

اذا بصير اليوم بصير دوم
حاذر انك تقوم بفعل معين وتتعوّد عليه او انك تتيح حدوث شيء ما بدك اياه او تسكت عنه لانه اذا صار مرة بصير كل مرة. دائما الخوف موجود انه المرة تصير مرات. ونفس الشي ينسحب على الامور العادية او الايجابية. مش شرط بس امور سلبية. انما الحذر والتحذير بكون اكثر من الامور السلبية.

إن شانئك هو الأبتر . شاني بالفلسطيني يعني ترك الشي او كرهه . الفعل شنا . مثلا العصفور شنى العش . يعني تركه. كلمة شنى دارجة عند الفلاحين وهي فرصة مناسبة لمقارنة لغوية مع آية من القرآن. العصفور طبعا بشنى العش لما يعرف انه اكتشف امره.

غايب فيلي
زي مقولة سارحة والرب راعيها. او بكلمة واحدة سارح بمعنى عقلي سارح. غافل. يعني في غفلة من امري. دايما ممكن تصير شغلات ما انتبهلها وانا سارح او غايب فيلي. او نايم ع وذاني.

سداد بداد
يعني تيكو بلغة كرة القدم. مثلا بتمارس لعبة انت وحد. نفرض شطرنج. اول مرة الاول بغلب وثاني مرة الثاني بغلب وهيك بتصيروا سداد بداد

راح بشُربة مية
يعني راح ببلاش وبشكل خاطف وعلى ولا اشي. مثلا واحد قضى في حادث طرق يقال راح بشربة مية. او اثنين تقاتلوا على شيء تافه وواحد قتل الثاني يقال راح بشربة مية. او واحد راح بشكل خاطف مثلا كان يشرب ودهورت بيه السيارة لعدم انتباهه يقال راح بشربة مية ...وهكذا

نيّالك ما اهدى بالك
واحد باله فاضي ما عنده هموم وما في وراه اشي او كما يقال ما في وراه لا ولد ولا قلد. او عاطل عن العمل ما بفكر بهموم الشغل. او ما عنده عائلة ما بفكر بهموم عائلة. او مزاجه رايق بتحكي معاه بأمور جدية وهو بلعب معك وبمزح. يقال له: نيّالك ما افضى بالك.

الدية عند الكرام الأعتذار
الدية تعطى في حالة قتل. تعطى لأهل القتيل كنوع من التعويض ويرافقها مراسيم صلح ومعاقبة الجاني الخ. وهناك من يسمح بحقه كاملا لاسباب معينة. مثلا حادث طرق غير متعمد او خلاف عائلي أدى في لحظة فقدان سيطرة الى كارثة غير مقصودة الخ. في هذه الحالة هناك من يقبل الاعتذار ويرفض الدية وهؤلاء هم كرام النفس. وطبعا رفقا بأهل الجاني وحالتهم النفسية في حال حادث غير مقصود. يقال اللي فيهم بكفيهم.

ومن الابيات الشعبية المعبرة :
"يا قعدتي بالدار علّـة والهموم كثار.. يا طلعتي في الخلا نزهة وطول أعمار"

حرب شلاليط !
قبل ان تتوفر التقنيات الحربية اللي منعرفها اليوم مثل السلاح الناري والسلاح الابيض كانت كثير طواش ايام زمان تنحسم سريعا من خلال حرب شلاليط خاطفة! كان العراك يتم بضربات سريعة وموجعة بالارجل تسمى كل ركلة شلّوط والجمع شلاليط !

اللي خلفو ابوك الك ولاخوك
يقال من باب الحث على التوافق والتراضي بين الأخوة حين توزيع تركة الاب او توزيع اي شيء تابع للوالد سواء في حياته او بعد مماته.

لولاني ولولا وجودي ما فرحت الرعنا ببيوت
الرعناء هي البنت او المرأة الطائشة التي لا تعتمد على نفسها فيتم مساعدتها اذا امكن من قبل الأهل. وحين تغضب الأم مثلا على بنتها الرعناء تخاطبها بالقول: لولاني ولولا وجودي ما فرحتي يا رعنا ببيوت!

بتروحو حبايل منثورة
مقولة ختياريات نابعة من ايمان عند الأم انه طالما هي موجودة بمعنى على قيد الحياة بامكانها ضبط اولادها وكبح جماحهم عن طريق تدخلها المباشر بينهم. والاولاد طبعا ما بقدروا يعتدوا او يتطاولوا على أمهم مثل ما بعتدوا على بعض. ودايما الام بتحذر اولادها وبتطلب انهم ينصاعوا لاوامرها لانه اذا ماتت وهم مختلفين راح يروحوا حبايل منثورة يعني راح يكون وضعهم مثل حبايل منثورة ومبعثرة (جمع حبل).

على راسي من فوق
تقال للموافقة على امر ما .. مع وضع اليد على الراس في اشارة الى ابداء الاحترام .. وكثير منسمع عن احترام الوالدين: انتم يما ويابا تاج على راسي والله ..

حط ايديه بمي باردة
يقال مثلا: ولا يهمّك خليك ريلاكس واطمئن حط ايديك في مي باردة. لانه وضع اليد في الماء البارد يؤدي الى الهدوء والطمأنينة وتبريد الاعصاب.

طنيب دخيل
لما واحد يبتلي مثلا في قتل بهرب من البلد وبدخل على قوم طنيب دخيل يعني طالب منهم النجاة والايواء والحماية من مطارديه. وفي الكثير من الاحيان يتم استيعابه في بلده الجديد ويصبح واحدا من اهل القرية.

لحلح ... تتلحلح
لحلحة هي حمام خفيف. يقال: بدي اتلحلح يعني اعمل حمام سريع. من كلمة لح يعني رطوبة بمعنى أرطّب جسمي. ومن هون اللحلحة هي كمان الطراوة في الكلام والمعاملة وخفة الدم. يقال فلان ملَحلح يعني رشيق في الكلام والتعامل.

دبس
في بيتنا كنا نقصد عسل الخروب. وفي سياق اوسع مربى من أشجار مختلفة.. ومربى الخروب يسمى طبعا رُب. ومن كلمة دبس أجت كلمة دِبسية وهي الصحن المعدني المستدير لوضع الدبس. وقد اشتهرت فلسطين بالدبس على انواعه. دبس تمر ودبس قصب السكر ودِبس عنب ودبس رمان وهكذا

حتى يرى الديك أرنب
مقولة ظريفة يقصد فيها انه الشخص تنعمي قماره ويبطل يشوف مليح من الارهاق او الضغط الجسدي والنفسي او اي سبب اخر . تقال مزاحا مثال : سهرت لحد ما تعبت وشفت الديك أرنب. وللتمليح تقال بالفصحى مثال: أنفضوه بدن (قتله) حتى يرى الديك أرنب! وهكذا

شاف نجوم الظهر
نفس السياق السابق. شخص من المعاناة والضغط شاف النجوم وقت الظهيرة في عز النهار او كما يقال عزّ الظهر . المعنى طبعا مجازا . مثال: فلانة شافت عندهم المرّ تعذّبت وشافت نجوم الظهر ..

من اسماء صابون الراعي في انحاء فلسطين: ركف, صابون الراعي , عصا الراعي, غليون القاضي, خرفان, جوز حمام, بخور مريم, زعمطوط, تاج سليمان, زقوقيا, صريمة الديك. ما يدل على عراقة ارتباط الانسان الفلسطيني مع بيئته الطبيعية. فالاسماء تحتاج الى أجيال كثيرة لتستقر في الذاكرة ما يدل على طول المدة وعظم التفاعل مع الطبيعة.
  
كل عقدة والها حلّال
العقدة هي عقدة الحبل. والحبل ممكن يكون خيط او نبات مثل الرباط والزرد او اي رُفّأع (غصن) أخضر وقوي كانوا يستعملوه حبال لشد حزمة حطب ومآرب أخرى كثيرة. ولما تنتهي الحاجة للعقدة يتم حلّها لتفريغ الحمولة او ما شابه. وكل عقدة الها حلاّل اللي هو الشخص اللي ربطها او حلاّل عُقد. وهيك في الحياة ما في عقدة الا والها حل او حلاّل.

الزمن دوّار
يوم الك ويوم عليك. لهيك لما بتكون على ظهر الفرس وقوي ووضعك كأنه مستتب وانت الأقوى ..الخ ما تعتز بنفسك او تنغرّ لانه الزمن دوار وراح تكون يوم من الايام تماما في الطرف الاخر والمعاكس. عشان هيك دايما حافظ على خط الرجعة ولا تقطع الحبل. ولا تحرق السفن ولا تطرد الخيول. ولا تقول عليّ وعلى أعدائي لانه هذا يدل على انتحار

اش لك بطول السيرة
تقال خلال الحديث اختصارا للوقت وتجنبا للاطالة والملل.

الله يطوّلك يا روح
او الله يجيبك يا طولة الروح. مثلا خلال نقاش عقيم ومتعب او مشاحنة او ملاسنة او نزاع مع شخص لا يلين ولا يستلين يستعين الطرف اليأسان بطولة صبره قائلا الله يجيبك يا طولة الروح..

يا روح ما بعدك روح
مثل مقولة يسلم راسي ولا عاش ولا راس. مثلا واحد هرب من معركة او مواجهة قائلا: ويا روح ما بعدك روح! والشرادة طبعا ثلثين المراجل! وكلمة شرد تفيد النجاة. شرد بمعنى نجا .. اما معناها اليوم : هرب. وهي تفيد نفس المعنى لانه الهريبة ثلثين النجاة كما هو معروف.

منبهة الليل
يقال فلان مثل منبّهة الليل. اي لا ينام في الليل او يصحو مبكرا مثل منبّهة الليل.. وهكذا

الليل ابو ساتر
يقال انه ما تخشى فعله في النهار علانية اعمله في الليل أستر الك وللناس. ومن هنا يقال الليل ابو ساتر . لكن احيانا الها معنى سلبي لانه تحت ستر الليل وجنح الظلام يفعل الناس الويلات..

دين عجايز
هو الدين بنقاوته وبساطته وعفويته وطقوسه البريئة بدون تعقيدات المشايخ وعلماء الدين. بتلاقي العجوز بتصلي وبتصوم وبتعبد ربها القيوم بدون تعقيدات..

نهار الزيت أصبحت امسيت
ايام قطف الزيتون قصيرة. بتكون الدنيا خريف أقصر ايام السنة. لهيك يقال نهار الزيت اصبحت امسيت يعني اليوم يمر بسرعة من الصبح للمسا ..

زي طلق ابو ريمة ..
مثل من عرعره. معناه رمية من غير رامي. ابو ريمه من عائلات قريتنا. وابو ريمه المذكور طلع مع جماعة من عرعره للصيد في نواحي البلد وطلع معاه طلق من الخرتوش صاب عصفورين فيما ذكر . وذهبت مثلا في بلدنا ..

العرق دساس
العِرق هو العصب بمعنى قرابة الدم اللي دايما تؤثر على صاحبها وتدفعه مرات الى التحيز الاعمى لقرايبه. لهيك يقال سلبا انه العرق دساس ولا تثق بشخص يتعاطى معك ضد قرايبه لغاية مؤقتة.

لوح دراس
لوح كان يستعمل لدرس الحبوب بعد احضارها من الحقل الى البيدر والجمع بيادر . ولوح الدراس يصنع من خشب قوي فيقال عن الانسان العنيد والمكابر : مثل لوح الدراس لا بوخذ ولا بعطي. يعني راسه قاسي!

اللي الو اصحاب كثير مالوش ولا صاحب
سنة الحياة انه اللي بيكثر من الاصحاب بتكون علاقته مع كل واحد منهم على حده على حساب الاخرين فيكون كأنه خسر اصحاب بعكس رغبته بتكثيرهم

خلي البيتين عمار
يعني خلينا نقسم الاشي بيننا ويعمرن البيتين. مثال الك قضية عند محامي او عقدت صفقة يقال خلي البيتين عمار يعني خلينا الاثنين نربح.

على قفا مين يشيل
لما بكون فائض في السوق لسلعة معينة يقال مثلا: العنب على قفا مين يشيل. يعني شيل وشو ما قلت شلت انت بتحدد السعر والتاجر يبدي ليونة لحتى يبيع. ويقال عِنا للعزابي اللي يبحث عن بنت بمواصفات خاصة: ول يا زلمي ما هذكي العرايس على قفا مين يشيل!

وشو جابت من عندار ابوها..؟
واحد بحكي قصة بيجي واحد ثاني بقولو لع مش هيك القصة. القصة هيك هيك هيك.. بحكيله الاول: وشو جابت من عندار ابوها..؟! انت عدت نفس القصة بس بشكل ثاني.. يعني هاي ذاني وهاي ذاني

راس النبع
المية الزلال الصافية دايما بتكون براس النبع. طبعا النبع كان اكثر ايام زمان لانه اليوم من كثر الشفط والأبار الارتوازية ما ظل نبع. زمان كان نبعة او عين مية كل كم متر . كانت عيون المية جزء من حياة الناس لانه ما كان في حنفيات وخلافه. كانوا يعملوا حوض للمية عشان تتجمع لسهولة الاستغلال للري والشرب وسقي الاغنام. وصار مصطلح راس النبع دارج يدل على الصفاء والنقاء. ولما بدهم يشربوا من العين كانوا يشربوا من راس النبع لنقاوة المياه. ويجيبوا مية بالجرة عشان تصفى بالدار .

العيلة بالليلة
يعني كل العيلة. مثال: دار فلان راحوا على العرس العيلة بالليلة يعني كلهم.

طاسة وضايعة
يعني الامر او المسألة ضايعة اختلط فيها الحابل بالنابل. مثال: في الحفلات او المناسبات العامة بتكون طاسة وضايعة ما حدا داري بحدا ... وهكذا

سيرة بتجر سيرة
بالعربي الشيء بالشيء يُذكر . بتحكي قصة بتذكرك بقصة ثانية وثالثة ورابعة وهيك السيرة بتجر سيرة والقصة بتجر قصة .. بشكل متوارد

ويا جبل ما يهزّك ريح

استوى العدس
مثال: تعبت وأصابني الارهاق من السهر يقال خلص استوى العدس بدي اروح انام .

إضرب التلّ تا يختلّ
تقال كلهجة تعجيز وتهديد . خلال نزاع مثلا يقول أحدهم للطرف الثاني: انا بدي اعمل هيك هيك واذا مش عاجبك روح اعمل اللي بدك اياه. أعلى ما بخيلك اركبه.. أضرب التل تا يختلّ .. في اشارة انه ضرب التلّ لن يغير شيء في الموضوع.

جبر الخواطر

يقال مثلا الله يجبر بخاطرك وهي نوع من المجاملة وتطييب الخواطر والمواساة والثناء. 


وطار الطير الله يمسيكم بالخير
تقعدوا بالعافية
أشوفكم على خير


محرر الصفحة
احمد ابو هلال
نيسان 2014

    الوقت/التاريخ الآن هو الخميس يوليو 19, 2018 12:04 am